TI
1528 (v.s.) 10 février. Paris. — « Commission du Roy pour loger les compaignies de messeigneurs de Laval et de Rieux et celle de Monseigneur.
« François, par la grâce de Dieu roy de France, à nostre très cher et amé cousin, le sire de La Trémoille, nostre lieutenant en noz pays de Poictou, Xainctonge, ville et gouvernement de La Rochelle, salut.
« Comme nous ayons esté advertiz que les gens de guerre de vostre compaignie et de celles de noz chers et ‘amez cousins les seigneurs de Laval, nostre lieutenant-général et gouverneur de Bretaigne, et de Rieux, à présent tiennent les champs en nostredict pays et conté de Poictou, faisans plusieurs grosses foulles et oppressions à nostre paouvre peuple, et pour ce que, pour le soullaigement d'icelluy et pour faire cesser lesdictes pilleries et oppressions, il est besoing et très nécessaire asseoir et establir esdictz pays et conté “le logeiz et garnison desdicts gens de guerre pour les faire vivre en bonne ordre et pollice, scavoir vous faisons que nous, ce considéré, vous mandons que incontinant vous ayez à commectre, ordonner et depputer telz
personnaiges suffisans et expérimentez que adviserez, à faire asseoir et establir ès lieux et places desdicts pays et conté de Poictou, que congnoistrez pour le myeulx, ledict logeiz et garnison des gens de guerre desdictes compaignyes, le pluz justement et esgallement et à ka moindre charge et foulle du peuple que faire se pourra, en leur faisant bailler et administrer vivres, utancilles et autres choses qui leur seront nécessaires, en les payant raisonnablement selon le taulx et pris de noz ordonnances sur ce faictes, en contraignant à ce faire et souffrir tous ceulx qu’il appartiendra et qui pour ce seront à contraindre, par toutes voyes et manières deues et acoustumées, nonobstant oppositions ou appellacions et dolléances quelzconques ; de ce faire avons à vous et à voz commis et depputéz donné et donnons plain pouvoir, commission et mandement espécial, mandons et commandons à tous nos justiciers, officiers et subjectz que à vous, vosdicts commis et depputez en ce faisant, obéissent et entendent dilligemment, prestent et donnent conseil, confort, ayde et prisons si mestier est et requis en soit. Car tel est nostre plaisir.
« Donné à Paris, le Xme jour de février l’an de grâce mil cinq cens vingt huict et de nostre règne le quinziesme.
« Par le Roy.
« ROBERTET
Chartrier de Thouars. P. Parch.
1528 (v. s.) 24 février. Berrye. — Mandement de François de La Trémoille au sujet d'un navire échoué à Olonne.
« Receveur d’Ollonne, nous vous mandons faire la mise nécessaire pour faire l’enqueste sur nos faictz et interdictz contre Jehanne Robert, veufve de feu don Ferrande d’Esbodille, et autres parties avecques elle, demandeurs, en déli-
vrance, pour raison des biens que prétendons nous appartenir par naufrage trouvez en ung navyre nauffragé en nostre couste d’Ollonne, et ce jusques à la somme de quinze livres tournois et au dessoubz. Eten prenant certifficacion de nostre procureur et autres officiers de nostre seigneurie d'Ollonne, ladicte mise par vous faicte pour l'affaire que dessus vous sera allouhée en la mise de voz prochains comptes par les auditeurs d'iceulx, ausquelz mandons ainsi le faire sans difficulté en apportant le présent mandement et certiffication desdictz officiers en forme deue.
« Faict à Berrie, le XXI1II° jour de febvrier, l’an mil cinq cens vingt huit.
« DE La TRÉMOILLE. »
Chart. de Thouars. P. papier.
1528 (v. s.) 9 avril. Thouars. — Mandement de François de La Trémoille à ses officiers de Marans, au sujet de la prise d'un corsaire. |
« Officiers de Marans, le capitaine de Marans et venu icy pour nous advertir d’une prinse qu’il a faicte d’un corsaire et pirate de mer qui a faict plusieurs maulx et pilleries, lequel est détenu prisonnier en nostre chasteau de Marans ; pour ce est il que nous entendons que bonne et braifve justice en soit faicte, comme il appartiendra, et si ledict corsaire est vacabont que ce soit par le prévost des mareschaulx si ainsi ce doibt faire et que ce. soit de sa jurisdiction, ou s’il est de céans et de ce pays par vous et nostre justice ordinaire et comme admiral patrimonial. A ceste cause vous mandons que faciez bon et ample inventaire, si faict n’a esté, des biens dudict corsaire à la conservacion du droict,
à qui il appartiendra, et que le tout soit mis entièrement sans aucune chose receller et les mectez ès mains dudict capitaine qui en respondra comme dépositaire de justice. L’on dit que ledict prisonnier avoit quelque argent qu'il bailla à quelqu'un depuis qu’il fut prisonnier, enquérez vous de tout bien et diligemment et n’y faictes faulte... Et adieu. De Thouars, ce IX d'avril. »
Ch. de Thouars. Pap.
1529, 15 décembre. — Les officiers d'Olonne rendent compte à François de La Trémoille de certains bateaux naufragés.
« Nous Jacques Le Lardeux, Jehan Bouhier etJehan Horris, séneschal, chastellain et greffier de la baronnye d'Olonne, certiffions à messieurs les audicteurs des comptes de Monseigneur que, en l’année présente fynissante le dernier jour de ce moys, sont advenuz en ladicte seigneurie les boys et naufrages qui s’ensuyvent: c'est assavoir, certain boys advenu au moys de janvier dernier, vendu à Colas Benaster judiciayrement, qui avoit trouvé ledict boys, sept sols six deniers. Ung aultre nauffraige advenu en l'année dernière duquel estoit poursuivy par justice Anthoyne Sallays qui en fyna judiciayrement à la somme de quatre livres tournoys. Ung bateau advenu environ la my-aoust, trouvé par Jehan Vervet et aultres, à luy vendu par le recepveur, ès absence des aultres officiers, le prix de quarante sols, comme les sergens présens à ladicte vente nous ont affirmé par serment. Ung aultre nauffraige advenu le pénultiesme jour d'octobre dernier vendu par le sergent du bailliage des Sables à Colas Brimaudeau, marchant commis à ce faire, pour le dangier de peste, le prix de cent dix sols, en laquelle y avoyt quelque peu de blé moillé. Ét n’en sont advenuz aultres qui soient venuz à noustre notice et cognoissance, par ces présentes
signées de noz seings, le quinziesme jour de décembre l’an mil cinq cens vingt et neuf. | J. Le Lanoeux, J. Bouuie, J. Honnis. »
Ch. de Thouars. P. papier.
1529. — Supplique de frère René Martin, prêtre, à François de La Trémoille, pour obtenir l'hermitage situé dans les bois de « la Poyssonnyer. »
« Suplie humblement à vous mon très-hault et souverain seygneur, monseigneur, vostre plaissyr sera entendre que il y a ung hermitage en vaulx boys de La Poysonnyer, lequel autrefoiz aviez donné à ung nommé frère Jehan Ryvault, lequel hermitage à présent il a délaissé et s’en est allé demourez auprès d'Angers en ung lieu dit Arculée.Pour ce, mondit seigneur, vous suplie moy pourvoyr de cedict lieu et ce faysant sera tenu et obligé prier Dieu le créateur tout le temps de ma vie pour vostre haulte et noble personne et aussy pour madame, messieurs vaulx enfans et toute vostre noble lignée.
« Vostre pauvre simple orateur, frère René Martin, pbre, pryant Jhésus- Crist et toute la court céleste qui vous donne bonne vie, prospérité et santé. »
Chartrier de Thouars. P. pap.
1530, 2 mai. Angoulême. — Réglement pour la subsistance des gens d'armes en Poitou.
« Le Roy estant à Angoulesme a ordonné que les gens d'armes et autres des ordonnances estans ès païs de Poictou, ou Xaintonge et ailleurs paieront les vivres de leurs chevaulx selon le taux qui en sera faict par les gouverneurs ou lieutenans dudict seigneur ès lieux où seront assises les garnisons, ou par ceux qui seront par eulx ordonnez et commis à ce faire ; et à fournir d’iceulx vivres, selon ledict taux, seront contraincts les gens des villaiges assis jusques à six lieues près du lieu où seront assises lesdictes garnisons, des foings, avoines et pailles croissans et cuilliz esdictz villaiges; selon leur qualité. Et quant est des vivres pour les personnes desdictes ordonnances, iceulx gens des ordonnances les paieront selon le cours du marché. Et a deffendu et deffend ledict seigneur à toutes gens, de quelque estat ou condicion qu’ilz soient, de lever aucuns deniers, taxe ou autre chouse sur le peuple pour les gens desdictes ordonnances, et à iceulx gens des ordonnances de faire aucun pillaige ou excès audict peuple. Le tout sur peine de la hart.
« Faict audict lieu d'Angoulesme, le lundi deuxiesme jour de may, l’an mil cinq cens trante. Ainsi signé :
‘ RaAGUENEAU. »
Ch. de Thouars.
1530. — Lettres de François de La Trémoille au connétable Anne de Montmorency.
«-Monsieur, pour vous advertir de ce qui a esté faict suyvant les derrenières lettres qu’il a pleu au Roy m'escripre, j'ai envoyé incontinent ses lettres pa-
tentes et escript à chacun lieutenant des sièges et ressors de ce pays pour les faire publier à la ville capitalle d’iceulx, avecques commission pour faire eslire à la noblesse des commissaires pour recepvoir les sermens et dixiesme partie de leur revenu, selon l'offre qu’ilz ont faict audict seigneur, ce qui a esté faict par lesdictz lieutenans, et baïllé terme de quinze jours à ladicte noblesse pour ce faire. Laquelle quant au duché de Chastellerault se sont assemblez avec monsieur de Monpesat et ont esleu les sieurs du Rouet et de La Masardière; et à Civray la pluspart desdictz nobles ont esleu les sieurs du Boys-Seguyn, séneschal dudict Civray et seigneur de Comporte. Quant aux aultres ressors ne se sont trouvéz aucuns de ladicte noblesse pour faire ladicte eslection. Ayant peur que la dissimulacion fust trop longue de leur faire de rechef assavoir, veu que ledict seigneur doibt fournir son argent dedans mars, me suis advisé d’en come mectre commissaires, assavoir ou ressort de Poictiers les sieurs d’Argenton, La Roche de Pouzay et de La Bourgongnière ; à celuy de Montmorillon les sieurs de Peirat et de Belabre ; à Fontenay les sieurs des Granges et de Sainct- Benoist; à Sainct-Maïxent les sieurs de Bongouyn et d’Availles, et à Nyord suis à m’en enquérir pour y mectre ceulx qui seront les plus suffisans, ausquels j'ai baïllé commission pour recepvoir tant leurs dictz sermens que la dixiésme partie de leurs fiefz et arrière-fiefz, et en faire estat et recepte par ordre, le tout receu dedans la my-febvrier, pour porter au lieu où il plaira audict seigneur ordonner. Et pour ce que lesdictz commissaires ont voullu savoir où ils prandroient la mise pour lever ledict offre et que aultrement ne le pourroient faire à leurs despens s'ilz n’en avoient ordonnance, ay ordonné qu'’ilz prandront leursdictz frais sur les deniers de ladicte offre, actendant le voulloir dudict seigneur, aussi afin que ses deniers ne fussent en riens retardez et où il luy plaira qu’ilz soient portez et qu’il escripve ausdictz commissaires qu'ilz ne faillent de faire ce que je leur ay ordonné de par luy, et en deffault où ilz se vouldroient excuser, qu’il advise d’ÿ pourvoir comme il luy plaira et le plus toust que faire se pourra. Car je y ay faict de bien bon cueur du myeulx que m'a esté possible et toutes les mises et fraiz à mes dépens où il luy plaira avoir regard et en la pension qu’il luy a pleu me ordonner que je n’ay receue.
« Monsieur, le Roy de Navarre et vous m'avez escript que le voulloir dudict
seigneur estoit que la compaignie de monsieur de Bonneval fust logée ou pays de Poictou, aussi que la commission qu’il luy a pleu expédier pour la desloger de Lymousin estoit pour la mectre en ce pays. Je leur ay faict baïller garnison et croy que de présent ilz y soient. Il m’en est venu quelques plainctes, aussi le séneschal de ce pays m'en a escript et tout incontinant ay envoyé devers ledict sieur de Bonneval pour y donner remède, ce qu’il a délibéré de faire à ce qu'il m’a rescript, car il a envoié devers son lieutenant en poste pour ce faire. L’on dit qu’il y en a d’aultres qui y sont venus sans commission, aussy que avecques eulx se amassent certains mauvais garçons de ce pays qui font beaucoup de maulx. J’ay escript aux provostz des mareschaulx de pourvoir à faire justice de ceulx de leur mestier et pour ce les suyvre et aux capitaines ne les tenir en leurs compaignies et ne céjourner au pays sans commission.
« Et veu la pouvreté du pays et pestillance qui y est, aussi que ce pourroit reculler l’amas de deniers dudict seigneur luy supplie en descharger le pays. Je vous prie, monsieur, faire qu’ilz soient mis ailleurs.
« Monsieur, j’ay mis toute la payne que j’ay peu pour accorder les différens qui sont entre la grant mère de mon nepveu de Mezières, le comte de Dampmartin et mondict nepveu, touchant le bail et le reste de sa succession, luy faisant toute l’offre honneste qui m’a esté possible pour y venir, ce qu’elle n’a voullu faire et ne sy est trouvé ledict comte, et pour ce que si elle faict comme elle a jà commancé elle destruyra entièremant mondict nepveu et le sieur de Beaumont qui sont ses héritiers. Et pour ceste cause ay chargé le présent porteur en advertir ledict seigneur et vous à ce qu’il luy plaise y mectre tel ordre que le bien de mondict nepveu soit conservé et gardé, car si je pensoys qu’ils ne fust homme de bien pour luy faire service, ne l’en suppliroys.
« Je vous prye, Monsieur, l'avoir pour recommandation à luy ayder. à
garder son bien. »
Chartrier de Thouars. Papier.
1531, 30 mai. Château de Taïllebourg. — François de La Trémoille donne à sa femme, Anne de Laval, l'administration des terres de Gargolay et de Laz.
« Franczoiïs, seigneur de La Trémoille, chevalier de l’ordre, comte de Guynes, de Benon, de Taillcbourg, vicomte de Thouars, prince de Thalmont, baron de Craon, de Suly, Montagu, L'’Isle-Bouchart, Berrie, et Doué, seigneur des isles de Ré, Marans et Noirmoustier, lieutenant général du Roy ès pays de Poictou, Xainctonge et La Rochelle, à tous ceulx que ces présentes lettres verront, salut.
« Savoir faisons que comme ainsi soit que, par le décès de feu de bonne mémoyre monseigneur Guy, comte de Laval, seroit advenu pour la part et portion qu’il auroit baillée à Anne de Laval, nostre espouse, sa fille, sur son partaige les terres de Gargolay et Laz, oultre ce qu’elle joissoit auparavant sondit décès, après avoir par nous pourveu aux choses qu’avons congneues estre nécessaires pour ladite succession et montrées à nostredite espouse, avons voullu et ainsi nous a pleu et plaist les fruictz, procès et tous esmolumens desdites terres de Gargolay et Laz et tous ceulx qui adviendront de ladite succession estre régiz et gouvernéz, administréz et conduicts par nostre espouse à en faire et dispouser pour ses affaires et autres choses qu’elle verra estre nécessaires, à son plaisir et voulloir, tant d’offices, bénéfices que autres choses despendans desdictes terres, et de ce luy en avons donné plain pouvoir, auctorité et mandement, comme si nous-mesmes le faisions, en mandant et commandant à noz officiers desdictes terres, chacun en droicts oy, à qui il appartiendra, donner tout le conseil, obeissance confort et aide au faict et teneur de ces présentes.
« Donné en nostre chastel de Taillebourg, le derrenier jour de may l'an mil cinq cens trante et ung.
De La TRÉMOILLE. »
« Par commandement de Monseigneur, présens les sieurs de Barbegieres, Ronssée et Sainct-Martin, noz maistres d’ostelz, et de nostre conseil.
« J. TROTEREAU. »
Chartrier de Thouars. P. parch.
1532, 10 novembre. Angers. — François d'Availloles, chevalier, seigneur de Roncé, porte, comme procureur de François de La Trémoille, « l’un des braz de la chaire en laquelle Jean Ollivier, évesque d'Angers », fait son entrée dans sa ville épiscopale.
« À tous ceulx qui ces présentes lettres verront, le garde des seaulx establiz aux contractz royaulx d’Angiers, salut.
« Savoir faisons que aujourd'huy, Xejour de novembre l’an 1532, ès présences de maistres Pierre Arambert et Pierre Deshaye, licenciez ès loix, notaires jurez desdictz contractz, s’est trouvé en l’église de Sainct-Aulbin d’Angiers, messire Françoys d’Availloles, chevallier, seigneur de Roncée et de Negron, soy disant et comme procureur spécial, quant ad ce, de noble et puissant Françoys, seigneur de La Trimoille, chevallier de l’ordre, conte de Guynes, prince de Thallemond, viconte de Thouars, baron de Craon et de Briolay, heure d’entre huit et neuf heures de la matinée dudit jour, lequel a prins l’un des braz de la chaire en laquelle le Révérend Père en Dieu Jean Ollivier, évesque d’Angiers a esté porté celluy jour, estant icelle chaire davant le grant autel de ladicte église Sainct-Aubbin, savoir est le braz dextre du quartier de derrière d’icelle chaire, et lequel braz dextre de chaire étoit lors semblablement tenu et pris par noble homme Brient de La Cour, seigneur du Bois, comme soy-disant
procureur spécial quant à ce de damme Renée de La Haye, damme de Beaupreau et baronnesse de Chemillé, disant ledit d’Availloles que comme procureur et ayant charge dudict seigneur de La Trémoille, baron de ladicte baronnye, terre et seigneurie de Briolay, et à cause d’icelle baronnye, il voulloit aider à porter ledit Révérend depuis ladicte église de Saint-Aulbin jusques en l’église d’Angiers et que, pour ce faire, il prenoit et que réallement a prins portion et l’un des endroitz dudict bras de ladicte chaire dudict cousté de derrière, et a dict audict de La Court qu’il eust à laissez ledict bras de ladicte chaire pour ce qu’il disoit que audict seigneur de La Trémoille, à cause de sadicte seigneurie de Briolay, ou à luy, comme son procureur susdict, apartenoit à avoir icelluy braz et à porter ledict Révérend dudict cousté dextre du quartier derrière de ladicte chaire.
« À quoy par ledict de La Court, parlant par la bouche de maistre Jehan Poisson,advocat et praticien en courtlaye à Angiers, a esté dict que à ladicte damme et baronnesse de Chemillé apartenoït à porter ledict Révérend dudict cousté dextre et quartier derrière de sadicte chaire, et que de ce faire elle et ses prédécesseurs estoient en bonne possession et saisine comme seigneur baron de Chemillé ; aussi que ledict de La Court estoit jà saisi dudict braz de ladicte chaire du quartier derrière d’icelle, et que au cas où ledict d’Availloles, procureur susdict, vouldroit et se efforseroit contre luy d’avoir et prandre ledictz braz de ladicte chaire dudict dextre quartier derrière et l'en voudroict desaisir et spollier par force ou aultrement indeuement, il protestoit et a protesté contre ledict d’Avaïlloles de le luy faire reintégrer et réparer et admender par voye de raison et de justice. Sur lesquelles parolles est venu audict lieu ledict Révérend pour se mectre en ladicte chaire, lequel voyant ledict débat et que tousjours ledict d’Availloles s’efforsoit grandement expulser ledict de La Court et empeschoit qu’il ne portast ledict braz dudict cousté derrière de ladicte chaire qu’il avoit prins et tenoit avecques ses mains, comme dict est, a dict qu’il avoit entendu que à la dernière foiz ledict seigneur de La Trimoille. avoit porté ledict braz du dextre cousté derrière de ladicte chaire du précédent, derrenier et immédiat évesque, et que pour obvier à tumulte et scandalle et sans préjudice des droiz de l’une et de l’aultre desdictes parties et pour ceste foiz seullement et sans ce qu'il tournast à conséquence à l’advenir et joucques ad ce que aultre-
ment en fut ordonné, il estoit d’avis que ledict d’Avoilloles porteroit ledict braz de ladicte chaire du dextre quartier derrière d’icelle, pour ledict baron de Briolay et comme son procureur, et ledict de La Court comme représentant ladicte damme de Chemillé l’aultre braz derrière de ladicte chaire. Quoy voyant, icelluy de La Court, et aussi pour ce que ledict d’Availloles tousjours le poursoit rudement l’empeschant qu'il ne portast ledict braz dudict dextre quartier de ladicte chaire, l’auroit laissé et auroit prins l’aultre braz derrière d’icelle chaire, et ensuyvant le dict et advis dudict Révérend, pour éviter scandalle et tumulte, comme dict est, o protestation expresse, par luy faicte, de non préjudicier ny desroger aux droictz de ladicte damme de Chemillé.
« Et ont lesditz d'Availloles et de La Court, en la compaignée d’aultres qui estoient davant eulx, porté depuisladicte église de Saïinct-Aulbin ledict Révérend joucques à ladicte église catédralle de ceste dicte ville d’Angiers, et après la messe dicte et célébrée par ledict Révérend et qu'il est entré en sa grant salle de son pallais épiscopal de cestedicte ville, où estoient préparées les tables pour faire le disner sollempnel de sa nouvelle entrée et bienvenue et qu’il s'est assis et mis à l’une desdictes tables pour disner et prendre sa réfection, ledict d’Availloles, ou nom et comme procureur spécial dudict seigneur de La Trimoille quant ad ce, l’a servy à sadicte table et disner de eschanson et luy a baillé à boire dans ung petit vaisseau doré. Dont et de tout ce que dict est ledict d’Availloles, procureur susdict, a requis et demandé ce présent instrument, ausdicts notaires, ce qu’ilz luy ont-octroyé. Et tout ce certiffions estre vray, par ces présentes signées des seings desdictz notaires, à la relation desquelz en ce et plus grant chose adjostons plaine foy, et néanimoins, pour plus grande aprobation, avons mis et aposé à sesdictes présentes le scel royal estably aux contractz de ladicte court cy mis et faict audict Angiers, ès jour et an que dessus.
« P. AremBenT, P. Desxayes. »
Chartrier de Thouars. Original parchemin.
1532 (v. s.), 16 fevrier. Paris. — Lettres patentes de François I“ en faveur de François de La Trémoille, lieutenant-général du roi en Poitou.
« François par la grâce de Dieu roy de France, aux senneschal de Poictou ou à son lieutenant et à tous noz autres justiciers et officiers des pais, contéz, terres, seigneuries et provinces dudict Poictou, Xainctonge, La Rochelle et Civray, ou à leurs lieutenans et à chacun d’eulx si comme à luy appartiendra, salut.
« Pour ce que nous voullons et entendons que nostre amé et feal cousin, le sieur de La Trémoille, gouverneur et nostre lieutenant-général èsdictz pais, contéz, terres seigneuries et provinces, joysse et use plainement et paisiblement des povoirs, puissances, facultez, prérogatives et prééminence appartenans audict estat et office de gouverneur et nostre lieutenant-général et mesmement en tant que touche le gouvernement et superintendance du faict polliticque, faire pugnir et corriger par nos senneschaux, bailliz ou leurs lieutenans, les abus, seddicions et monopolles, aussi le regard sur le faict des gensdarmes et garnisons estans èsdicts pais, conservacion et entretenement de noz ordonnances et autres choses que peult et doibt avoir et qui touchent et appartiennent à ung gouverneur et nostre lieutenant-général ès lieux de nostre obéissance, comme plus amplement le contiennent noz lectres de pouvoir et provision que luy avons par cy-devant faict expédier dudict estat et office: Nous, à ces causes, vous mandons, commandons et très expressément enjoignons, que en toutes et chascunes les choses qui touchent, compectent, et appartiennent à icelluy estat et office de gouverneur et nostre lieutenant-général, pour le bien, proffict et utillité de noz affaires et de la chose publique desdictz pais et provinces, vous et ung chascun de vous, en droict soy luy obéissez et entendez et luy faictes obéyr et entendre de tous ceulx et ainsi qu'il appartiendra et besoing sera, sans aucune difficulté ou contradiction, ainsi que à noz propres com-
mandemens et ordonnances, car tel est nostre plaisir et voulloir. Et pour ce que de ces présentes l’on pourra avoir affaire en plusieurs et divers lieux, nous voullons que au vidimus d’icelle, fait soubz scel royal, foy soit adjoustée comme à ce présent original.
« Donné à Paris, le seiziesme jour de febvrier, l’an de grâce mil cinq cens trente deux et de nostre regne le dixneufiesme.
« FRançoys.
« Par le Roy, le sieur de Brion, admiral de France, présent.
