ALEXANDRE

Chartrier de Thouars. Pièce papier.

XXIIT

15 75, 19 octobre. Paris. — Lettres patentes de Henri III en faveur de Louis III de La Trémoille.

« Henry, par la grâce de Dieu, roy de France et de Polloigne, au seneschal d’Angiers ou son lieutenant et gens tenans le siège présidial audict lieu, salut. Nostre cher et bien amé cousin Lois de La Trémoille, s' dudit lieu, duc de

Thouars, chevalier de nostre ordre ct cappitaine de cinquante hommes d'armes de nos ordonnances, nous a faict remonstrer que de toute antienneté ses prédecesseurs et luy se sont vertueusement emploiés au services des defunctz roys, nos prédecesseurs, et de nous, au faict des guerres qui ont eu cours en ce royaulme, comme encores il désire continuer, et que à cause desdites guerres huyt ans sont ou environ qu’il n’a jouy de la tierce partie du revenu de ses terres pour estre par force d'armes occupées par nos subjectz qui portent les armes contre nous et nostre aucthorité; et néantmoings que vous, sans à ce avoir esgard, auries, à la requeste de nos chers et bien aymés les manans et habitans de la ville d'Angers, ordonné que nostre dit cousin ou les fermiers de ses terres de Craon, Rochefort et La Possonnière, estans soubz vostre ressort, seroient contrainctz de mettre en icelles places certaine quantité de munitions, d'armes, pouldres et vivres, avecques nombre de soldatz, laquelle fourniture revient à si grande et excessive dépence que le receveur des dictes terres ne seroit à beaucoup près suffisant pour y satisfaire, tellement qu’en ce faisant il n’auroit moien de vivre et entretenir sa maison, nous suppliant à ceste cause de l’en vouloir descharger et pourveoir à ce que pour l’advenir luy et sesdictz fermiers ne soient travaillés ne empeschez pour semblables occasions de jouir des revenus des dites terres, en luy donnant pleine et entière main levée d’icelles terres qui ainsi saisies ont esté, et de ce luy octroier toutes les lettres requises nécessaires.

« Pour ce est-il que nous, désirans en cest endroict pourveoir à nostre dit cousin et favorablement le traicter pour l'affection qu’il demonstre porter à nous faire service, vous mandons et enjoignons, par ces présentes, que toutes et chacunes les saisies et mainmises faictes et apposées sur les terres susdites appartenantes à iceluy nostre dict cousin, de vostre ordonnance, pour les occasions susdites, vous levés et ostés, ainsi que par ces présentes nous les levons et ostons en luy baillant et faisant baïiller et à ses dicts fermiers plaine et entière main levée des revenuz d’icelles, et d’icy en avant les laisser et souffrir jouir entièrement, plainement et paisiblement, remectant et faisant remettre et reparer le tout au premier estat et deu et plaine et entière deliyrance ; et où les dictz fermiers auroient fourny anlcuns deniers à l’occasion susdicte, nous vous mandons d’abondant les faire rendre et restituer incon-

tinant et sans delay par les recepveur et autres qui les auroient touchés sans qu’il y soit faict aucune difficulté, car tel est nostre plaisir.

« Donné à Paris, le XIX:° jour d'octobre l'an de grâce mil cinq cens soixante quinze et de nostre règne le deuxiesme.

« Par le roy : De NEUFVILLE. »

Chartrier de Thouars. Copie papier.

Sans millésime, 6 mars. Paris. — Lettre de Louis III de La Trémoille et de Nicolas d'Anjou à François de La Trémoille.

« Monseigneur, nous nous recommandons très-humblement à vostre bonne grâce. Monsieur le prince et moy nous sommes tousjours bien portés, fors que sommes ung peu enrumez, mais monsieur maistre Gabriel nous a visités, qui nous a dit que ce ne sera rien, si Dieu plaist. Monsieur d'Angoulesme est demeuré par pareille cause. Messieurs le daulphin et d'Orléans sont allez à Saint- Denys avec toute la compaignye des dames. Nous espérons veoir l’antrée qui sera mardy, comme l’on dit. Perséverans tousjours en bonne volenté de bien servir à Dieu, d’obéir à monsieur de La Rivière et de bien estudier, monseigneur, nous prions Nostre Seigneur vous donner en santé très-bone et longue vie. De Paris, ce VIe mars.

« Vos trez humbles et obéisans filz et nepveu

« L. De La TRÉMoILLE. N. D'ANJOU. »

Chartrier de Thouars. Original papier.

Sans millésime, 22 novembre. Paris. — Lettre de Louis III de La Trémoille à sa mère Anne de Laval.

« Madame, je me recommande à vostre bonne grâce tant et si très-humblement comme je puys.

« Madame, j'ay receu les lettres qu’il vous a pleu m’escrire par lesquelles vous me mandez que je serve bien Dieu et Nostre-Dame, ce que j'espère de faire si bien que serez contante. Je vous supply, madame, m'envoyer des chemises et ma cappe et aussi à mon cousin qui est allé à matin voir sa grant mère, et faisons luy et moy très-bonne chères et suis bien guéry de mon rume. Monsieur d'Angoulesme et mesdames ses sœurs me font la plus grant chère du monde. Madame de Montreul met bien peine de me tenir en leurs bonnes grâces, dont pour ce vous supplye luy escrire et l’en remercier.

« Madame, je supplye le Créateur vous donner très-bonne vie et longue. De Paris, ce XIIe jour de novembre.

- « Madame, je me suis oblié de vous escrire commant j’ay sceu que m’aviez faict ung petit frère quy a non Guy. Je vous supplie, madame, faictes le bien nourir, car je l’aime bien. J’ay dict à monsieur d’Angoulesme que je donneroys monsieur le comte, mon frère, à monsieur d'Orléans, et mon frère Charles à luy, et ay dict à madame Madalène que je luy donneroys ma sœur Loise et à madame Marguerite ma seur Charlotte.

« Vostre très-humble et très-obéissant filz

« L. DE La TREMOILLE. »

Chartrier de Thouars. Original papier.