XX VI
Sans millésime. 11 mai, Thouars. — Lettre de Louis III de La Trémoille à Anne de Laval, sa mère.
« Madame, j'ay receu les lectres qu’il vous a pleu m'escripre par mon frère ensuyvant l’entreprinse que vous avez entendue de luy. Il s’en va en la meilleure dilligence qu’il pourra pour trouver monsieur d'Anguyen à Lyon, qui depuys son arryvée en ce lieu luy a faict entendre qu’il y seroit dymanche prochain. Je Luy ay faict ce qu’il m’a esté possible et désire à mon pouvoir qu’il ait l'honneur si grand que je vouldroys pour moy, affin que vous en eussiez l'aise que vous espérez qui n’est moindre de ma part.
« Et quant ès affaires de noz debtes et aultres chouses dont il vous plaist m'escripre, je n’ay eu moindre poursuicte que vous de Bastonneau et Gohory:; et de me charger les satisfaire sur ce que j’ay receu de Craon, vous savez, Madame, que je suys chargé d’aultres chouses à acquitter et dont je ne me pourroys bonnement descharger, et davantaige l’on faict adreisser pour le tout sur moy ceulx ausquelz nous sommes tenuz par moictié contre ce qui en a esté advisé par le départ de noz debtes, et ne say, madame, par quel moyen se conduict ceste affaire, mais je le voys chacun jour ainsi, ce que je ne vouldroys souffrir de la part de mes gens et le povez bien scavoir de la debte de monsieur l’archidiacre du Bellay et de monsieur de Mézières, dont vous savez que vous estes tenue pour la moictié, qui me faict vous supplier m'en descharger et de faire veoir par voz gens à l'affaire de monsieur de Mézières, tant en ceste ville que à Paris, et je leur feray monstrer tout ce qui en est céans. Aussi vous plaira de pourveoir à ce qui est assigné sur ma terre de Gençay pour m'en descharger de la moictié affin que j'en puisse joyr, et des aultres affaires, où vous prétendez n’avoir eu ce qu'il vous appartient, mes gens seront tousjours prestz d’y faire veoir avecques les vostres, et de ce qui en sera advisé par le conseil je n’yré jamais au contraire. Vous supplyant, madame, me com-
mander ce qu’il vous plaira pour vous obéyr d'aussi bon cœur que je vous présente mes très-humbles recommandations à vostre bonne grace. Et pour fin de ma lectre, je supplye à nostre Seigneur, madame, vous donner très-bonne
et longue vie. Escript à Thouars, ce XI+ de may, « Votre très humble et très obéissant filz
« L. DE La TRÉMOILLE. »
Chartrier de Thouars. Pièce papier.
