DRAPPIERS ET MARCHANS DE POIX

1. Item, les drappiers en groz ou a détail, les peletiers en groz ou a détail, les espiciers, feutriers, tappissiers, frappiers, cordiers, vendeurs de hanaps et tous autres marchans d'avoir de poix pourront prendre de leur marchandise et en leur marchandise u sols parisis pour livre d'acquest en pays de parisis; et tournois en pays de tournois; et de la marchandise de tournois et non plus, en regard a ce que la marchandise leur couste rendue a Paris tant seulement, sans y mectre ne convertir autres coustz ou fraiz ; et jureront lesdits maistres et marchans par leurs seremens ce tenir et garder, et en regard a ce qu'ilz achèteront les marchandises et a la monnoye. Et se ilz font le contraire, ilz l'amenderont a volenté, et si perdront la marchandise, et aura l'accuseur le quart de l'amende.

2. Item, nul correctier de drapperie, de peleterie, d'espicerie, de chevaulx, de mercerie, de foing ne d'autre marchandise quelle elle soit, ne pourra marchander, n'estre marchant par luy ne par autre, ne estre compaignon de la marchandise dont il sera correctier. Et tous les correctiers donrront bons pleiges, sur peine de perdre leur mestier, et d'amende de dix livres, toutesfoiz qu'il fera le contraire, dont l'accuseur aura la quarts partie de l'amende.