MARCHANS DE SEL

1. Item, tous marchans qui amenront sel pour vendre a la saulnerye a Paris depuis quilz l'auront entamé et mis a feur ou a pris, ilz ne le pourront enchérir ne mectre a plus hault pris en la nef que cellui qui mis y sera; et se ainsi estoit que, pour cause ou pour la volenté du marchant ou vendeur, ilz le voulsissent lever et mectre en grenier ou greniers, faire le pourront, mais ilz pourront estre contrains par le prevost de Paris ou l'un des auditeurs de Ghastellet, appelé le procureur du Roy et le prevost des Marchands, après xl jours, de mectre leur sel a taverne, se mestier est, et a pris convenable en regard au pris quilz l'achèteront, et au temps quilz le vendent, et a la monnoye, et par leur serment. Et leur sera ordonné sur ce pris convenable par les dessus nommez, en regard au temps dessusdit; et ne le pourront enchérir puis que le grenier sera ouvert et mis a feur. Et seront aussi contrains a le faire lesdits marchans qui auront sel en grenier par les dessusdiz ou par l'un d'eulx; et se ilz font le contraire, ilz l'amenderont a volenté et perdront la marchandise.

2. Item, que depuis que le sel sera meu d'aucuns lieux pour venir a Paris, nul ne le pourra ou devra acheter, par terre ne par rivière, pour revendre a Paris, se ce n'est par la manière dessusdite, ne au port aussi; et quiconques fera le contraire, il perdra la marchandise et l'amendera.

3. Item, nul marchant de Paris qui achètera sel en la nef ou en grenier pour revendre a Paris, ne pourra acheter a une foiz ne tenir en son hostel ne ailleurs, que ung niuy de sel, mais en pourra chascun acheter hors de Paris et le mectre au grenier pour revendre en la manière que dessus est dit; et se ilz font le contraire, ilz perdront la marchandise, et seront en amende voluntaire.

Hanouars.

h. Item, les henouars porteurs de sel auront et prendront en la manière quilz ont accoustumé de longtemps, selon le registre de la marchandise et non plus, sur peine d'amende et de perdre leurs offices.