EPISTRE A SON AMY LYON

Je ne t'escry de l'amour vaine et folle, Tu veois assez s' elle sert, ou afl'olle; Je ne t'escry ne d'armes ne de guerre, Tu veois qui peult bien, ou mal y acquerre; Je ne t'escry de fortune puissante, Tu veois assez s' elle est ferme, ou glissante: Je ne t'escry d'abus trop abusant. Tu en sçais prou,* et si n'en vas usant; Je ne t'escry de Dieu, ne sa puissance, C'est à luy seul t'en donner congnoissance ; Je ne t'escry des dames de Paris, Tu en sçais plus que leurs propres marys; Je ne t'escry qui est rude, ou aft'able; Mais je te veulx dire une belle fable , C'est assavoir du Lyon et du Rat.

Cestuy Lyon, plus fort qu'ung vieil verrat, Veit, une fois, que le Rat ne sçavoit Sortir d'un lieu, pour autant qu'il avoit Mengé le lard^ et la chair toute crue.