ÉCRITE DE SA PRISON EN ANGLETERRE

Chancelier, et vous trésorier, je vous ay plusieurs fois escript pour le fait de Jehau Victor lequel n'est pas le sien mais le mien. Car il n'est en nul dangier se non pour le fait de la despence de beau frère d'Angolesme et des autres hostages qui sont par deçà avecque lui, et aussi pour aucunes despences qu'il m'a falu faire par deçà pour mes nécessités, et en outre quant maistre Robert de Tuillièrez, dont Dieu ait l'ame, fust par deçà, par son conseil et avis furent fais certains apointemens aveeques aucuns de par deçà qui avoient quittances de beau cousin de Clarence et des autres a qui je suis par deçà tenu, pour la délivrance de beau frère d'Angolesme et à la descharge du dit fait; lesquelx apointemens a fallu que le dit Jehan Victor ait acomplis et paies du sien propre, car les dits gens ont voulu avoir argent content, car par ce les enemis ont quité la moitié de ce qu'il leur estoit deu les autres le tiers, et les autres le quart ; la quelle chose vient en grant rabat et descharge et aquit du dit fait de beau frère. Si est ainsi que le dit Jehan Victor a mis hors de ses mains pour tous les dessus dis affaires sis mille escus du sien propre, qui est grant somme et dont il est en grant nécessité, perte et dangier de sa marchandise, et ne pourroit maintenant aider a nul besoing que je aye, ne à beau frère, ne aus autres hostages. Toutes fois par deçà on ne peut pas vivre ne faire despenccs pour nient comme vous povez bien penser. Si

faire convient que ce soit que le plus briefment que vous poures et en toute haste vous envoies par deçà sis mille escus pour paier le dit Jehan Victor et en outre le plus avant que vous pourrez pour les nécessités et affaires de mon dit frère, de moy, et des dis ostages, ou autrement le dit Jehan est deffait et faudra à nous tous quant nous aurons besoing. Or est ainsi que j'ay asses fait mon devoir de vous en escripre et par plusieurs fois, mais il me samble que vous en tenés petit de conte et les metes en nonchaloir. Si vous en escris cestes foiz pour toutes : si faites comment que ce soit qu'en ce n'ait point de faute ne plus de délay et ne penses que le dit argent ait esté emploie en folies ne mal apoint, mais soies seur qu'il a este emploie par mon sceu et commandement et en ay receu le conte duquel je sauray bien faner quant il sera besoing. Je ne vous en pense plus a escripre ; mais pensé a pourveoir en mes besongnes d'autres serviteurs qui sont plus diligens de moy obéir et acomplir mon commandement que vous ne estes. Je vous ay aussi plusieurs fois escript en charge du fait de la délivrance du dit beau frère ; si weil et me atens qu'en faciès diligence telle que mon dit frère et moy vous en doyons savoir gré et en estre contens, et envoies en la main du dit Jehan Victor tout l'argent que envoierés par deçà et non à autre : car j ay pris seur été de lui qu'il ne se paiera sur le dit argent en riens pour le fait de beau cousin de Vendosme, ne pour nulle autre chose; ne il ne l'emploiera se non ou fait de beau frère, de moy et des ostages et par mon sceu et commandement. En outre je weil que vous faitez requestes a monseigneur le Dauphin en son conseil de par moy lui remonstrant comment je me suis obligé pour beau cousin de Vendosme lequel m'a failli, dont je suis en dangier, et pour ce que je lui supplie qu'il weille prendre en sa main la terre et biens du dit beau cousin et qu'il soit tellement ordonné que sur la dite terre et biens soit trouvée chevance, par les commis a ce de mon dit seigneur le Dauphin, par laquelle je puisse estre en ce mis hors de dommage ; et le dit beau cousin m'a fait savoir qu'il estoit content que je trouvasse fiance sur ses terres se je povoie; mais je ne weil pas que la dicte exécucion soit faite se non par les oficiers et commis de mon dit seigneur le Daulphin et non pas par les miens. Si faites en ce diligence comme verres que sera de faire.

En outre sachies que j'ay receu une lettre de vous Chancelier escripte le xvie jour de juillet, lesquelles m'ont esté aportées par un serviteur de un Lombart nomme Benedic Augustin; en laquelle lettre me escrives entre autres choses sur l'ofice de la maistrise de eaus et fores d'Orléans. Si sachies que je l'ay donnée a Archembaut de Yilars à la requeste de beau frère de Angolesme et pour les bons services que le dit Archembaut m'a fais et les peines qu'il a par deçà souffert pour moy. Mais je weil que tel lieutenant soit ordonné pour lui que vous choisires et les autres de mon conseil, estans par delà par éleccion qui soit congnoissant et proufitable à mon bien en la dite office, et j'ay chargé au dit Archembaut de le recevoir; et l'office que le dit Archembaut avoit eu nouvellement par mon don des eaus et forests de Valois je l'ay donné à la requeste de beau frère de Vertus a messire Charles de Giresmë ; si faites faire les lettres de tous deux à l'un de mes secrétaires à ce par moy ordonnés, auquel j'en donne charge et commandement et à vous pareillement de les passer et délivrer.

Quant à ce que m'aves escript, que vous aves enlencion de envoier par deçà un de mes serviteurs pour me dire bien a plain de loutes mes besongnes, sachies que j'en suis très content et joieus, et vous charge que vous faites toute la diligence que vous pourres par devers le roy d'Angleterre et par tous les bons moïens que saures aviser et penser, que ladite venue par deçademondit serviteur puist estre le plus brief que faire se pourra, affin que par lui je vous puisse mander ma voulenté sur toutes mes besoingnes. En outre délivrés l'argent que envoieres par deçà à Bernart Warnich fatteur dudit Jehan Victor, lequel doit estre par delà en France ou cas que ledit Jehan Victor vous fera savoir qu'il weille que ainsi se face.

Escript de ma main en bon point et santé de ma personne, la mercy Nostre Seigneur, où chastel de Peutfrett, le iif jour de septembre, l'an mille quatre cens dix et neuf.

Ainsi signé CHARLES.

J'ay tant en moy de desplaisir, Puis qu'il me convient de partir, Hélas ! de vous et loing aler,

Et si je ne puis à vous parler, Dont j'auray maint mal à souffrir.

N'est riens qui me puist esjouir, Si n'est le très doulx souvenir Que j'ay par vous bien fort amer.

J'ay tant en moy de desplaisir.

Adieu, ma joye, mon plaisir, Adieu, mon loyal souvenir, Adieu, belle Dame sans per.

Adieu dire m'est coup mortel, Car je m'en vois sans vous veoir :

J'ay tant en moy de desplaisir.

Mon amy, Dieu te convoyé, Et brief te remaint à joye, A ton honneur et plaisir, Tout ainsi que je désir, Mieulx que dire ne sauroye.

Se par souhait je povoye, Plus souvent te reverroye, Mais, las ! ne te puis veoir.

Mon amy, Dieu te convoyé.

Geste chançon je t'envoye, De m'amour par grant montjoye, Si t'en veuilles esjouir ; Car te jure, sans mentir, Que t'ayme, loing que je soye :

Mon amy, Dieu te convoyé.

Faictes pour moy, com j'ay pour vous : Retenez-moy par dessus tous Amy tout seul, très belle Dame ; Je vous jure sur Dieu, sur m'ame, Ne vueil servir autre que vous.

Faictes pour moy, com j'ay pour vous.

Guérissez moy du mal d'amours, Et me donnez du bien de vous, Reconfort tel plus ne m'en chaille.

Mon bien, m'amour, mon fin cueur doulx, A vous me rens, à vous suis tous ; Faictes pour moy, com j'ay pour vous.

Je vous ayme plus que autre femme ; N'autre que vous n'aura la garde, Hélas! de moy, qui suis à vous.

Faictes pour moy, com j'ay pour vous.

BALLADE DU ROI FRANÇOIS Ie'.

Triste penser, en prison trop obscure, L'honneur, le soing, le debvoir et la cure Que je soustiens des malheureux souldardz, Devant mes yeulx desqueîz j'ay la figure, Qui par raison et aussi par nature Debvoient mourir entre picques et dardz, Plustost que veoir fuyr leurs estendardz, Me font perdre de raison l'attrempense Quand de te veoir j'ay perdu l'espérance.

Tousjours amour par fermeté procure Qu'à désespoir point ne face ouverture ; Mais tous malheurs viennent de tant de parts Qu'ilz me rendent indigne créature, Tant que d'erreur à mon chef faiz ceinture. Ces yeulx baignez vers toy font les regardz Ne faisant plus contre ennuy les rempartz; Si n'est avoir ton nom en réverance Quant de te veoir j'ay perdu l'espérance,

Mais je ne sçay pourquoy tourna langure En mal sur moy : car ma progéniture Eut tant de biens, qu'en tous lieux fust espars : Plaisir pour dueil estoit lors leur vesture ; Plaisante et doulce sembloit la nourriture

De leurs subjectz, gardans brebis es parcs. Tousjours bâtirent les lyons et liépars; Mais j'ay grand peur n'avoir tel heur en France , Quant de te veoir j'ay perdu l'espérance.

0! grande amour, éternel, sans rompture, Dont l'infinie est juste la mesure, Dy moy, perdray-je à jamais ta présence ; Doncq brief verras sur moi la sépulture : E'esperit à toy, pour le corps pourriture, Quant de te veoir j'ay perdu l'espérance.