BALLADE XV

Quelles nouvelles, ma maistresse ; Comment se porte vos amours ?

De ma part je vous fais promesse Qu'en ung propos me tiens tousjours, Sans jamais penser le rebours.

C'est que seray toute ma vie Vostre du tout entièrement :

Et pour ce, de vostre partie Acquittez- vous pareillement.

Combien que Dangier et Destresse Ont fait longuement leurs séjours Avec mon cueur, et par rudesse

Luy ont monstre d'estranges tours; Helas ! en amoureuses cours C'est pitié qu'ilz ont seigneurie :

Si mettray paine que brietment Loyauté sur eulx ait maistrie; Acquittez-vous pareillement.

Quoyque la nué de Tristesse

Par ung long temps ait fait son cours,

Après, le beau temps de liesse

Vendra qui donnera secours

A noz deux cueurs : car mon recours

J'ay en espoir en qui me fie

Et en vous, belle, seulement,

Car jamais je ne vous oublie :

Acquittez vous pareillement.

Soiez seure, ma doulce amie, Que je vous aime loyaumenl :

Or vous requier et vous supplie Acquittez-vous pareillement.