SAOULS D'OUVRER ET ENRAGEZ DE RIEN FAIRE
(Confrairie des). Les grands statuts et ordonnances de cette association imaginaire ont été publiés au XVIe siècle. C'est une facétie dont l'édition originale est devenue introuvable aujourd'hui, mais elle a été réimprimée dans la collection des Joyeusetés publiée par M. Techener, libraire. Nous espérons qu'on ne sera pas fâché de la retrouver ici.
Les grands statvs et ordonnances de la grande Confrairie des saovls d'ovvrer et enrage^ de rien faire, ensemble les grands Salaires que recèleront ceux et celles qui auront bien et deuement obserué les dicts Status et Ordonnances, avec les monnoyes d'or et d'argent, seruans à la dicte cour. A Lion. — Statvs et ordonnances de la Cour de Monseigneur Monsieur Sainct Lasche. — De par Saoul d'ouurer, par la grâce de trop dormir, roy de négligence, duc d'oisiuetéj palatin d'enfance, viscomte de meschanceté, marquis de trop muser, connestable de nulle entreprinse,, admirai de faintise, capitaine de laisse moy en paix, garde et gouuerneur de tous ceux et celles qui ayment besongne faicte, et du tout acheuée, seigneur de ne rien faire, escuyer et courrier ordinaire de la cour de monseigneur monsieur Sainct Lasche : A noz amez et féaux les généraux et conseillers sur le faict de nulle science : à nos trésoriers et argentiers
sur le faict de nulle finance, qui sont noz aydes, et à nos maistres de plusieurs affaires : à nostre baillif, salut, sans dilation et nul confort; Nous auons entendu par bonne et suffisante complainte de nos bien amez et alliez les gens de nostre cour de Chasse Proufit, comme sont pauures, souffreteux, endebtez, malheureux, mal fortunez, miseraux, querelleux, nécessiteux, rachepts, rongneux et teigneux, vuidez de richesses et indigens,de tous biens priuez, et de tout en tout despoûillez, que sur peine de cinq marcs d'estouppes, d'estre bouillis en bran, et bruslez en la riuiere, vous ayez à tenir les ordonnances qui s'en suiuent de par nostre très ancien seigneur et indiscrette personne Ponts Maudiné nostre maistre esleu par les conseillers de nostre cour de Chasse Proufit, que combien tant pour eux que pour leurs prédécesseurs dont ils ont cause, ayent esté, sont et seront encore, et demeureront (si Dieu plaist) en bonne saisine et vraye possession de ne rien auoir, et de tousiours moins acquérir pour nous, ny pour autres en aucune manière, et de faire tousiours grandes debtes, et pour iceux debtes estre tousiours emprisonnez, gagez, excommuniez plus souuent que chascun iour. Et si, par aucun cas d'accident ou de fortune, il leur aduienne aucun peu de rente, ou quelque bonne et valable possession (qu'à Dieu ne plaise) ils en doibuent ordonner et disposer en ceste manière qui s'ensuit, c'est assçauoir : qu'ils laissent leur maison cheoir à terre, et mettre en ruine, afin qu'il ne pleuue dessus, aussi par eux chaulfer du bois de la couuerture d'icelle maison, s'ils sont gens qui puissent endurer le feu.
Item qu'ils laissent leurs terres et héritages sans les labourer, ne rien y semer, pour la doubte des oyseaux, lesquels mangent les semences et les fruicts quand ils sont meurs, et après laissent venir leurs prez en ruines, espines et buissons : afin que les regnards, Heures, lappins, cerfs, biches, porcs, sangliers et aultres bestes sauvages puissent habiter ausdits prez et y faire leurs retraictes, et les oyseaux y faire pareillement leurs nids, si mestier est. En outre, laissent leurs vignes venir en herbes et déserts, pour obuier et résister aux grandes peines, labeurs,
SAO igg
missions et despens qu'il conuient de faire ; et mettre vn chascun an pour les labourer et fessorer.
Item plus, laissent leurs boys couper, rompre, tailler et destruire, pour cause de bestes sauuages et des larrons, qui en cause de nécessité pourroient faire leurs retraictes, afin d'eux se musser et cacher.
Item, qu'ils laissent rompre et creuer leurs estangs, pour cause que les poissons et autres bestes, comme escreuisses, raues, chaboux, qui sont dedans, qu'ils puissent estre hors de prison, et s'esbattre parmy les champs, et changer vn peu de lieu.
Item, qu'ils laissent leu.rs moulins cheoir et tomber en ruyne, pour cause de la farine qui gaste les robbes des bonnes gens qui y viennent moudre : et pour ce, et à cause que nous gardons et maintenons en nostre dicte cour de Chasse Proufit, fine franchise, folastrerie, chasteau tout y faut, que iamais ne mourra sans héritiers, et de leurs autres biens, rentes et reuenus, que il n'aduienne, si Dieu plaist, aucun bien ny proufit. Aucuns nos autres iusticiers et subietes, si comme sont esceruelez, fols, frénétiques, outre-cuidez, cornars, musars, teigneux, rongneux, pleins de vermine et autes bauards sans raison, ne bort, ne maison, renuerseurs de tasses, vuideurs de couppes, crocheteurs de bouteilles, blanchisseurs de beurre, taincturiers de nappes, rostisseurs de trippes, escumeurs de pots, vireurs de rost, tireurs de chair du pot trois heures auant qu'elle soit cuite, regardeurs et gardeurs de gaiges en plusieurs lieux par défaut de plus suffisant, quand ils ont à besongner auec leurs heraux, si comme sont lanterniers, buffetiers, crieurs de vin à vendre, ruffiens, bordeliers, menteurs, bourdeurs, yurognes, gourmans, truans, porteurs d'images, bastelleurs, trompeurs, barateurs et coquilleurs. Lesquels se sont parforcez, et vn chacun se parforcent d'entrer en nostre grand et terrible royaume de Verte-Bise et Frappe- Vent. Et veulent édifier maisons et hébergement qui sont désolez, et de longtems destruicts. Nous les souhaitons, desirons et voulons garder en tel estât bien longuement. Et qui pis est, ils deslaissent d'aller par les bonnes villes de nostre royaume, et
autres lieux à cause du grand argent qu'on leur doibt et qu'ils doibuent.
Pareillement, afin de trouuer tauernes et cabarets pour passer leur temps et augmenter leurs honneurs en soustenant lesdicts status et coustume de monsieur Sainct Lasche,car ils ne veulent prendre aduantage sur personne quelconque, si d'aduenture ils ne le peuuent trouuer, ils ne se rompent pas les iambes à les chercher. Et en retournant desdictes tauernes et cabarets, ont accoustumé de se battre, et de donner les vns aux autres grands tatins et horions, gros et menus, lesquels horions par faute d'espace se donnent auec grosses pierres et gros tronsons de boys, et qui pis est, payent de deniers bruslez, liards affacez, carolus, soûls et testons qui ne se mettent en pain, en vin, en chair, ny poisson. Et en partant desdictes tauernçs en contant à leurs hostes et hostesses, leurs baillent à garder par faute d'argent, robbes, manteaux, cappes, savons, chausses et pourpoint, et autres habillemens , si d'auanture ils ont grandes estaches de chiens, grosses pierres blanches, et noires, sapphirs iaunes, diamans noirs, et perles rouges, et plusieurs autres pierres pretieuses, lesquelles donnent en gaige, et à garder soubz les deux yeux de la teste, iusques à temps qu'ils ayent loisir de les payer, au grand preiudice et dommage desdicts complaignans en les perturbant à tort et à droict, et sans cause et raison deuë. Et de nouueau en venant contre les priuileges de nostre souueraine cour de Chasse Proufit, requerans sur ce prouision de iustice. Parquoy Nous ces choses considérées, et après auoir ouy lesdits complaignans, nous vous mandons, et commandons que royallement e^ défait, vous les mainteniez et gardiez en vraye saisine et possession, d'auoir tous les dimanches deux miches de faute, le lundy faute de vin, le mardy, mercredy, et ieudy nécessité de chair, le vendredy et samedy comme les autres iours, et de n'en rien auoir en tout temps, fors seulement toute leur vie pauureté et misère. En cas d'opposition non suffisante, attendu que lesdits complaignans ne sont tenus, si ne leur plaist, de procéder ailleurs, fors en nostre dicte cour de Chasse Proufit, vous leur donnerez et as-
signerez iour non competant pardeuant l'vn de nos iuges, ou pardeuant son lieutenant pour les reculer de bien en mal, et procéder de mal en pis, et de pis en pis, et encore outre pis, sans occasion, ny ryme, ny raison : car, ainsi le voulons, et ausdits complaignans l'auons octroyé et octroyons par ces présentes. L'an de grâce spéciale aux lamberrieres, trois iours après iamais en nostre ville de Meschance, auprès de nostre cité de Malaise. Scellez de nos petits sceaux par défaut de nostre grand sceau (qui est chez l'orfeure engagé pour la façon). Et signées par les maistres des souffreteux, à la relation des endormis. Tesmoins Iehan Gueneau, Thibauld l'Enflé, et Guillaume Mausoupé, à ce requis sans appeller. Et signées par nous autres notaires, cy soubz nommez. DES VIGNES, DES BLEDZ.
La description des grands salaires que recevront ceux et celles qui auront bien et duement gardé et observé les Ordonnances de monseigneur Monsieur Sainct Lasche. — Bachvs Cupido, Ceres, Pallas et Venus, regens et régentes des priuileges ordinaires de la souueraine cour, nostre grand maistre monsieur Saint Lasche, salut. Veu et considéré que selon les mérites de ce monde on est rémunéré en l'autre : Nous ayans esgard et respect à nos amez et féaux seruiteurs et seruantes de nostre cour de monsieur Sainct Lasche, faisons assçauoir à vn chascun et chascune, que pour la rémunération du bien et de l'honneur qui se sont parforcez en ce monde, à l'honneur de nostre dit maistre eux trespassez de ce monde en l'autre, auons trouué vne isle assise en vn lieu délectable, où à tout iamais pourront demeurer en ioye et félicité, sans auoir pensement quelconque, comme vn chascun pourra puis après ouyr et entendre : car au milieu de la dicte isle il y a vn chasteau tellement construict et édifié que c'est vn cas incredible, sinon à ceux qui l'ont veu et bien regardé. Car les murailles dudit chasteau sont toutes faictes auec gras fromage de Milan, toutes en pointes de diamans, et ont telle propriété que tant plus on en oste, et tant plus en reuient. Les créneaux et fenestrages sont des caillettes auec vne manière de mortier fait auec beurre frais, fromage et force sucre. Les ponts le-
uis sont pauez auec force casse museaux, les chaines à leuer lesdicts ponts leuis sont faictes d'andoûilles et de gras boudins farciz et roustiz tous prez à manger et grignotter. A l'vn des costez dudit chasteau, à main escarre sont situez palais/ chambres et salles tous pauez de pierres précieuses, comme iacinthes, rubis, esmeraudes, escarboucles, perles, turquoises et gros diamans, qui est vne chose fort magnifique. Et sont lesdites chambres toutes voûtées de petits pastez, les licts sont de plume de fenix, et les chalis de fin yuoire, ouurez et taillez à plaisir, les courtines de fin drap d'or faictes en broderie triomphante. Les cuissinets de velours cramoisi, tellement que quand on a dormi dix ans, il ne monte pas dix heures. Les tables, tréteaux et scabelles sont faictes de bois d'aloës, de sandix, et de cyprez, qui rendent vne odeur si suaue et si magnifique,, qu'a bien considérer c'est vne chose deificque. Les nappes et seruiettes sont faictes en taffetas blanc, les platz, escuelles, et toutes autres vaisselles sont faictes d'escarboucles taillées et deuisées en toutes sortes et manières qu'on sçauroit demander. Tellement que quand voulez asseoir à table, vous n'auez sinon à demander telles viandes que voulez, que les auez incontinent toutes taillées et prestes à manger. Et si ne voulez prendre la peine à les tailler, vous n'auez sinon baillé, que les morceaux sautent incontinent en vostre bouche. Et au sortir desdictes tables, vous auez toutes manières d'instrumens, comme orgues, tabourins, rebecs, aubois, trompettes, lucts, psaiterions, clairons et manicordions, lesquels sont de si mélodieux accords qu'vn an ne dure pas vn iour. Or, quant au costé droict vous auez les iardins de plaisance, où y a toutes manières de fleurs qu'on sçauroit demander; un peu plus auant vous trouuerez vne vallée en laquelle y a plusieurs belles fontaines qui rendent vin blanc, vin clairet, vin cuit, vin grec, hippocras, maluesie et fin muscat; un peu plus auant y a vn petit verdier auquel tombe quand on veut de gresse qui n'est sinon toutes manières de dragées, comme camellat, grangeat, girofflat, madrians, anis, coriandres, dragée musquée de toutes autres couleurs. Et est ledit verdier tout fermé et enuironné d'arbres qui
SAO 2o3
portent faisans, gelines, perdrix, connils, beccasses, chappons et espaules de mouton toutes rosties et prestes à manger. Et en montant vn peu plus hault,voustrouuezvne montagne si haute que quand vous estes au-dessus, vous pouuez toucher au ciel, si y voulez toucher : et porte ladîcte montaigne vne* sorte d'arbres qui portent toutes manières d'habillemens, comme robbes, cappes, manteaux, gonnelles, manchons, chapperons, etc. Et quand vous en voulez auoir, vous n'auez sinon à parer les espaulles, qu'incontinent sautent dessus. C'est pourquoi vn chacun se pourra parforcer de maintenir, obeyr et seruir aux commandemens de monseigneur monsieur Sainct Lasche, pour paruenir à la félicité des choses susdictes.
Item, et pour la grande multitude de nos dictes terres et seigneuries il y a plusieurs gens qui bien souuent sont nécessiteux et ont affaire d'or et d'argent, et ne sçauent que valent plusieurs pièces d'or et d'argent. Et à cause qu'ils n'en ont point et n'en manient gueres, et si en voudroient beaucoup auoir, mais aucune fois il fait si grand froid qu'ils ne sçauroient tirer vn escu de leur bourse. A celle fin nous y voulons pouruoir et remédier, et mettre prix raisonnable selon la valeur de l'or et monnoye de nostre dicte cour. Donné en nostre dict siège de Maugouuerne, l'an du monde six mille six cens et six, et le trente sixiesme du mois passé, signé par le grand conseil, et par nostre dit chancelier. Raguin, paintre des rouges museaux.
S'en suit la valeur et le prix de VOr monnoye de nostre dicte
Cour.
