LE PORTRAIT DE PANURGE

subject de nature à une maladie qu'on appeloit en ce temps-là faulte d'argent.... Toutesfois, il a voit soixante et trois manières d'en trouver tousjours à son besoing, dont la plus honorable et la plus commune estoit par façon de larrecin furtivement faict ; malfaisant, pipeur, buveur, batteur de pavés, ribleur s'il en estoit à Paris ; au demourant le meilleur fils du monde, et tousjours machinoit quelque chose contre les sergens et contre le guet...

Il avoit en sa poche un daviet, un pélican, un crochet et quelques aultres ferrements, dont il n'y avoit porte ni coffre qu'il ne crochetast.

En l'aultre, tout plein de petits goubelets, dont il jouoit fort artificiellement, car il avoit les doigts faicts à la main comme Minerve ou Arachne, et avoit autrefois crié le Thériacle. Et quand il changeoit un teston ou quelque aultre pièce, le changeur eust esté plus fin que maistre mouche, si Panurge n'eust faict esvanouir à chascune fois cinq ou six grands blancs visiblement, apertement, manifestement, sans faire lésion, ne blessure aulcune, dont le changeur n'en eust senti que le vent.

(Liv. II, chap. xvi.)

Fin de compte, il avoit, comme ai dict dessus, soixante et trois manières de recouvrer argent ; mais il en avoit deux cent quatorze de le despendre, hors mis la réparation de dessoubs le nez.

[Liv, II, chap. xvii)

Voilà Panurge; consultez la gravure : que vous en semble?