P. 182] DE PEYRE DE RUER

Pierre de Ruere, gentil-homme yssu de noble mayson de Puymont, fut amoureux d'une gentil femme de la mayson de Caraciole de Naples, bon poëte provensal; tout ce qu'il faisoit et disoit estoit agréable à tous ceux et celles qui prenoyent plaisir à la poésie. Ayant suyvi long temps les guerres au service du comte de Provence, et les estudes tout ensemble, selon le temps et la commodité qui se presentoyent, se trouvant un jour en Provence, où de ce temps les poètes et la poésie estoyent grandement estimez, fut surpris de la beauté de ceste dame, qu'estoit en Provence, fille d'un fameux che-

valier de Naples. Apres l'avoir aymee un long temps, sans qu'elle luy voulust donner audience, voyant que argent et chevaux luy defailloyent, emprunta un habit de pèlerin, que le peuple avoit de ce temps en grand dévotion et révérence pour raison de la saincteté qu'estoit ca-[P. 183]-chée en l'habit, vint environ la sepmaine peneuse où tout le monde estoit en dévotion en un chasteau près d'Aix en Provence, nommé le Puy Saincte Reparade, et ayant parlé au curé et viquere de l'église du lieu, tenant quelques papiers pliez en main, faisant entendre avoir permission du supérieur de ce faire, le jour du vendredi sainct, à faute de meilleur prescheur et denontiateur de la parolle de Dieu, monta en chaire, et commensa à dire quelques menuz sufrages, et avecques un front haut et eslevé chanta ce chant d'amours, car autre chose ne savoit:

Pauc m'anvalgut mos precs, nymos prezics, Ny jauzimen d'Ausel, ny flour d'Eglay, Ny lou plazer que Dieu transmet en May Quand on vey verds lous prats, ny lous garrycs.

Et pauc my val (segon so qu'yeu vey aras) Lou dol qu'yeu ay que m'aucy, e m'accor, Ou qu'yeu fussa reclus soubta un gran tor Que sufertar tant greus doulours amaras.

Sa chanson finie, continua derechef a dire quelques exortations au peuple, lequel meu de pitié pleuroit et souspiroit amèrement, cuidant que ce fut une orayson à Dieu ou à la Vierge Marie ; et de rechef chanta les sept Pseaumes en rithme, ausquels chacun [P. 184] print grand plaisir, et ayant donné la bénédiction au peuple, descendit de la chaire la teste basse, et tout marmiteux se meist a la porte de l'église à demander l'aumosne : avant que partir de là, son chappeau fut plain de monnoye. Et ce faict, s'en retourna à Aix par devers sa dame bien vestu, selon la mode d'adonques. Elle le voyant si bien en ordre, receut plusieurs caresses d'elle, que le Monge des Isles d'Or n'a voulu escrire, et moins Sainct Cezari, et le Monge de Montmajour en parie trop grassement ; et ce fut environ le temps que dessus qu'il trépassa.