juin 1555. — Lettre du roi Henri II à M. du Lude
Mon cousin, pour ce qu'il n 'advient guères que je touche les mallades des escrouelles, sinon la sepmaine saincte et ez festes de Penthecouste, Nostre-Dame de my-aoust, la Toussains et Noël, d'aultant que quelques foys je suis à la guerre, ou bien que pour aultre occasion je séjourne un peu en ung lieu à ceste cause et que journellement il vient en ma court plusieurs Espaignols, Espaignolles et aultres estrangers mallades desdites escrouelles, lesquels pour l'occasion susdite sont contraincts d'attendre longuement à estre touchés, qui leur est grand peine et travail ; désirant les en relever, je veulx et entends que vous faites publier de par moy sur la frontière de mes pays et duché de Guyenne, ez lieux et endroicts que verrez estre requis, que nuls desdits mallades estrangers ayent plus à venir en mon royaulme pour se trouver là part que je seray, affm d'estre touchés de moy pour obtenir guarison desdites escrouelles,
si ce n'est ez temps susdits de la sepmaine saincte et festes de Penthecouste, Nostre-Dame de my-aoust, la Toussains et Noël, faisant par mesme moyen publier et defFendre que Ton n'ayt plus à prendre d'eulx pour les laisser entrer en mondiet pays de Guyenne aucun argent ne aultre chose quelconque, comme Ton dit avoir esté cy-devant faict, dont je suis très-mal content, mais les laisser passer seurement, sauvement et sans aucun empeschement, soit en venant ou retournant et leur bailler et administrer vivres, logeys et aultres choses nécessaires en payant raisonnablement, soubs peine à ceulx qui feront le contraire d'estre punis et chastiés exemplairement; à quoy vous tiendrez la main et vous me ferez en ce faisant très-agréable service, priant Dieu, Mon cousin, qu'il vous ayt en sa saincte garde.
Escript à Fontainebleau, le 10^ jour de juing 1555. Signé : Henry. Et plus bas : Clausse.
La suscription : A mon cousin le conte du Ludde, chevalier de mon ordre et mon lieutenant au gouvernement de Guyenne en l'absence de mon cousin le roy de Navarre *.
