ANTOINE ROI DE NAVARRE A LA DUCHESSE DE VALENTINOIS

10 janvier 1557 (1558).

Madame, il ne sera jamais besoing de m'user de grande persuasion pour me faire avoir agréable une chose de si bonne considération que le mariage de mon nepveu le conte d'Orval avecq Mademoiselle Dyanne votre petite fille , car oultre que le Roy et la Royne m'ont faict cest honneur de m'escrire qu'ils le trouvent bon, et que mon frère Monsr de Nevers et ma seur sa femme ne m'en font pas moindre démonstration, je prévoy tant de bien qui peult venir aux ungs et aux autres, avecq le temps, de ceste alliance que je tiendrois plustost la main à l'accomplir, que de la rompre ; mais pour ce que les choses n'en sont point en ce danger, et que je les voy déjà aux termes qu'elles se peuvent désirer, je vous diray, Madame, que je ne suis sinon bien marry que je ne m'y puis trouver, affin de monstrer par ma présence le plaisir et contantement que j'en ay, espérant que ceste unyon de deux personnes qui nous touchent à vous et à moy de si près, sera cause de contynuer à estraindre davantaige la parfaicte et bonne amytié, que je vous supplye me départir avecq vostre bonne grâce, à laquelle je présente mes humbles et plus affectionnées recommandations.

Pryant Dieu, Madame, qu'il vous doint en bien bonne santé contante et longue vie.

Escript à Bragerac, ce xe jour de janvier 1 557. Votre humble et plus affectionné cousin à vous faire service.

Antoine.

(Bibl. nat. Fr. 3136, fol. 40. — Original, signature autographe.)

Ma mie, j'ay tardé plus longuement à vous renvoier Monsieur de Duras1, que je ne pançois; parce que j'é voullu parmy toutes lez affères du Roy faire Testât de mon filz, qui n'a peu estre sy tost achevé que je désirois, pour vous le plus tost renvoie, il est bien instruit de toutes les nouvelles de ceste court, enssemble de mon intention, qui sera cause que ne vous ferés ceste lettre plus longue, fors vous asseurer que vous serés la bien venue et d'aussy bon cueur attendue.

Qui sera la fin, ma mie, de suplier le bon Dieu vous avoir, et le petit mignon et la mignonne2, en sa saincte et bonne guarde.

Vostre plus affectioné amy et plus loial mary.

Antoine.