COMME DOIBT ESTRE FAICT ET SCITUÉ LE CHENIL

Le Chenil doibt estre faict a cinq ou six cens pas de la maison du seigneur ; il doibt estre accompagné d’vn pré d’vn arpent ou arpent et demy, dedans lequel il y ayt de l’eau viue et courante, et de clorre de pallisou de muraille : ilfault prendre garde de scituer et planter le lieu où les Chiens couchent , de façon que le midy et couchant n’y donnent poinct, affin de le rendre plus fraiz , il doibt estre de sept toises de long et cinq de large, on y doibt faire vne cheminée de trois toises , entourée de barreaux de bois , pour garder les Chiens d’approcher trop près du feu. Ledict lieu doiht aussy auoir d’vn costé et d’aultre la largeur d’vne toise et demye, estre releué de la haulteur d’vn piedd’ais qui soient trouées, affin que le pissat, la sueur et puanteur du Chien coule en

bas , et qu’au millieu il demeure vne allée de deux toises de large, plancheée comme le reste, où il y ayt deux ou trois bastons fichez couuertz de paille, contre lesquelz les Chiens puissent pisser : il le fault aussy lambrisser d’ais par le dedans , et qu’entre la première couuerture et le lieu où sont les Chiens il y ayt vne séparation , comme vn grenier, où les garçons des Chiens puissent coucher, que les fenestres soient si haultes que les Chiens n’en puissent sortir. Derrière ledict parc et Chenil il fault qu’il y ayt vne court, à l'vn costé de laquelle il fault qu’il y ayt vn logis pour les Veneurs et des estables pour tenir leurs cheuaulx, et que de l’aultre costé il y ayt trois ou cinq petitz Chenilz particuliers de deux toises en carré, tant pour mettre les Chiennes chauldes que les Chiens malades , et ceulx qu’on doubte de la rage : à vn des coings de ladicte court il y doibt auoir vn four et vne chambre pour le boulanger. Voila comme doibt estre faict le Chenil et ce qu’il y fault obseruer.

CHAPPITRE XVIIe.