DU VENEUR
Avant que de parler des parties que doibt auoir le Veneur pour estre parfaict, je veulx dire qu’au temps passé il y auoit de deux sortes de Veneurs, au lieu qu’il n’y en a maintenant que d’vne : car les vns et principaux estoient congnoisseurs qui alloient au bois et laissoient courre les Gerfz, et les aultres se nommoient picqueurs, de façon que le congnoisseur ne se disoit picqueur, etlepicqueur n’estoit congnoisseur. En sorte que les picqueurs estans à la queue des Chiens, s’ilz voyoient bondir le change, ou bien qu’ilz recongneussent quelque changement de chasser à leurs Chiens, estoient contrainctz, et l’art le vouloit, qu’ilz les rompissent en brisant aux dernieres voyes qu’ilz auoient chassé, et n’osoient passer oultre que les congnoisseurs ne fussent arriuez. Eulx venuz falloit qu’ilz missent pied à terre, et qu’auec grand jugement demeslassent le Cerf d’auec leur change, et ainsy le remissent deuant les Chiens. Tout aussy tost qu’il estoit relancé, les picqueurs faisans leur estât suivoient les Chiens, et les congnoisseurs montans sur tracquenars suivoient la Chasse de loing, jusques
DU CERF
à ce qu’vn aultre deffault vint : ce qui causoit que les Cerfz duroient beaucoup d’auantage qu’ilz ne font à présent, pour la longueur qu’il y auoit à releuer les deffaultz. Mais comme en toutes choses les hommes auec le temps et l’aage se subtilisent, et que ceulx qui ont du jugement tirent profïict de l’experience des choses, les Veneurs ont appris à faire l’vn et l’aultre, de mode qu’il fault estre picqueur, ensemble congnoisseur, pour estre bon Veneur, c’est à dire ne perdre jamais ses Chiens de veue quand ilz chassent, et bien congnoistre d’vn Cerf par les signes et jugemens que je descriray par cy apres. Et pour ce qu’en cela il y a beaucoup de peyne et trauail, il fault que le jeune Gentilhomme que l’on veult rendre bon Veneur, soit bien sain, dispost et de belle taille, qu’il ayt l’esprit bon, notamment le jugement prompt et vif, d’aultant que la principalle partie de l’art consiste en la promptitude du jugement, et d’aultant que le prouerbe dict que l’aage d’vn homme n’est suffisant pour bien et parfaictement apprendre vn art: le plus jeune que l’on y peult entrer est le meilleur, et singulièrement en celuy de la Venerye, auquel on voit et congnoist chascun jour choses nouuelles, que la nature des bestes apprend aux hommes. Le poinct principal est de considérer que la force y soit pour porter la peyne. Il me semble que celuy qui est sain et bien composé peult commancer à douze ans, ayant en cest aage j ugement pour apprendre et retenir ce que l’on luy peult monstrer par la veue et enseigner par l’ouye.
CH APPITRh XXIe.
DU IUGEMENT QUE L’ON A d’vN CERF PAR LE PIED.
Phebus dict que pour dresser vn jeune homme à avoir congnoissance d’vn Cerf par le pied, il fault que le Veneur qui le mene en ayt vn dedans sa poche, et que comme il est au bois, qu’il le pousse en terre si ferme que la marque en demeure emprainte : puis, qu’il appelle son disciple pour luy faire voir et luy apprendre ainsy les congnoissances qu’il y a. Mais je ne suis de cestaduis, d’aultant qu’vn pied de Cerf se retressit et seiche, quand il y a quelque temps qu’il a esté leué du corps du Cerf. Il fault seulement quand l’on vient à trouuer les voyes d’vne beste , luy monstrer les congnoissances qu’il y a, et par icelles juger s’il est Cerf ou Bische. Phebus dict aussy que toutes voyes où l’on peult coucher dedans les quatre doigtz sont d’un Cerf, Cerf de dix cors : et où l’on ne peult coucher que les trois, il peult estre Cerf de dix cors. Or je diray auec vérité que dedans les voyes où l'on peult coucher quatre doigtz, c’est d’vn Cerf: mais il ne s’ensuict qu’il soit grand vieulx Cerf, et Cerf de dix cors. Tout Cerf qui a le pied grand et large ne l’ayant creux, n’est pas signe qu’il soit vieulx : et mesmement quand
DU CERF
il n’a pas les costez gros et espois, encores que ceste façon de pied se le monstre plus que non pas le creux. Si auec le grand pied il a les pinses grosses et larges, qu’il ayt les os longs et creux, la jambe large, et bas joincté, c’est signe de vieillesse. Il y a vne aultre façon de pied que l’on appelle pied rond : si vous voyez d’vn Cerf qui ayt le pied court, qui n’ayt les pinses rondes, ains au contraire qui les ayt aigues et trenchantes, que les costez du pied soient de mesmes, ces Cerfz là ont communément la jambe estroitte et les os fort deliez, ce n’est pas signe de vieillesse : mais si vous voyez vn gros pied court, qui ayt les pinses rondes et mousses, les costez du pied gros et combles, la jambe large, et les os courtz et espois, c’est signe de grande vieillesse. Ces sortes de pieds là, tant grandz piedz comme courtz, viennent communément en lieux où n’y a poinct de marestz. La première sorte de pied dont j’ay descript, l’on l’appelle communément pied de Veau, et la derniere, trace de Sanglier. Au contraire, au pais de marestz, les Cerfz qui s’y nourrissent ordinairement ont vne aultre sorte de pied, car si vous voyez d’vn Cerf qui ayt le pied plat et comble en telz lieux, vous pouuez juger qu’il est jeune Cerf, et si d’auanture vous voyez qu’il ayt les os longs, gros ou creux, et la jambe large, il fault présupposer que c’est vn Cerf despaïsé et qui vient d’un pais sec : car les Cerfz nourris en pais de marestz sont tous ainsy que les Cheuaulx qui y sont nourris; d’aultant que le pais est doux et mol, qui ne leur mange et ronge la corne, le pied leur croist de telle façon qu’il deuient
long et creux ; encores qu’il n’ayt les costez gros et espois, pourueu qu’il ayt la pinse ronde et grosse, c’est signe de vieillesse. Or en ceste façon de pied ilz n’ont pas la fente si large que les aultres : mais ilz ont les os plus longs et plus creux, et ne fault trouuer estrange quand l’on voit les piedz de derrière de ces Cerfz là : car communément ilz sont longs et si fort estroictz, que l’on les couuriroit bien du poulce, ces Cerfz là sont Cerfz de repos. Au contraire les jeunes Cerfz en ce mesme pais ne laissent d’auoir le pied creux, mais ilz ont les pinses aigües, et les os plus courtz, et moings creux, et communément le pied de derrière meilleur, c’est à dire plus grand et plus large que les vieulx Cerfz, ce n’est pas qu’ilz ayent plus de corne au pied, mais comme ilz vieillissent le pied se resserre, et se resserrant ne donne en terre, sinon des deux costez du pied et de la pinse, de sorte qu’il n’est si bon congnoisseur qui n’y soit bien souuent trompé : ces pieds là communément s’appellent piedz de nasselle. Voila les trois sortes de piedz que communément ont les- Cerfz : mais pource qu’il ne me suffit pas d’escrire seulement ces choses communes, je diray par le menu les congnoissances qu’il y a d’entre vn jeune Cerf et vne Bische : car jusques à ceste heure je n’ay parlé que de la congnoissance du vieulx Cerf d’auec le jeune. Or tout Cerf qui porte six est congnoissable d’auec les Bisches, et celuy qui ne le peult congnoistre n’est digne d’estre appelé Veneur, ce n’est pas qu’il ayt le pied plus grand d’ordinaire que les bestes, mais il y a deux choses à quoy c’est que l’on
DU CERF
ne se peult tromper. L’vne est que si voyez d’vne beste qui ayt le pied qui ressemble à celuy d’vn Cerf, et que vous en soyez en doubte, considérez à la jambe, quelle elle est, car jamais Bische pour vieille qu’elle feust n’eut la jambe si large qu’vn Cerf de six cors, et si d’auanture vous luy trouuez plus large que l’ordinaire desBisches, considérez que les os en sont longs et creux, par cela vous pourrez juger que c’est une vieille beste, et qu’estant vieille elle n’a pas assez de pied, ny les costez ny les pinses assez bonnes pour estre vieulx Cerf, et aussy que les os en sont tousiours plus deliez, et communément sont plus haultes joinctées que les Cerfz. Au contraire vn jeune Cerf encores qu’il ayt les costez du pied tranchez et la pinse aigüe, si est ce qu’il a tousiours le pied de derrière meilleur, c’est à dire plus grand, et la jambe plus large qu’vne vieille Bische. Les Cerfz qui ont la jambe large et neantmoings n’ont le pied bon, sont communément Cerfz de dix cors, sans estre grandz vieulx Cerfz : car c’est signe que la jambe et le pied de ces Cerfz là est en croissance, et que nature ne luy baille encores en cest endroict sa nourriture.
CHAPPITRE XXIIe.
