LETTRE DU CONNETABLE DE SAINT-POL A DAMMARTIN

(11 octobre 1472)

Monseigneur le grand maistre, je me recommande a vous et vous escrips presentement pour ce que chascun jour et heure Je suis adverti du desordre qui est à Saint Quentin et au pais environ par les gens darmes et mesmement depuis que y faictes tuition, laquelle chose comme est me samble ne deveres pour le bien du Roy et de la ville vouloir souffrir, et mesbahis beaucop de ce que ne mectez autre provision au fait des portes par lesquelles chascun jour on aporte les biens du plat pays, tant vivres comme autres en grant habondance et comme se on venoit de courre pays dennemis, qui est cause de la destruction du peuple, rompement des marches et aussi cherté pour les gens d'armes qui veulent vivre en bon ordre. Et pour vous advertir, monsieur le grant maistre, je ne porroye bonnement tollerer que ladite ville et le pays fust ainsi romput par voz gens et ceux de voz nepveux, actendu que je scay et congnois assez que se nous tumbiens en quelque treve ou guerre, vous nestes pas ne eulx deliberez dy demourer pour la garder, et fauldroit que moy et ceulx qui le vouldroient entreprendre a garder entreprenissent ceste charge après que laveriez ainsi foulee et gastee. Pour quoy je vous prie bien a certes que vous plaise cy tenir et faire tenir sy bon ordre que scavez et congnoissies que besoing est et que les pouvres habitans pour avoir fait service au Roy nen soient point ainsi destruis et aussi quil ne soit besoing que je len advertisse.

Monseigneur le grant maistre, je prie Nostre Seigneur quil soit garde de vous. Escript a mon chastel de Hem le xr° jour doctobre.

Le conte de Saint Pol et conestable de France, Vostre Loys.

(Bibl, Nat. Ms /r., n°2913166);