PREUVE XCVIII

1537, 2 juin. — Mandement de Charles-Quint concernant la radiation,

sur l'inventaire des joyaux de la couronne, des bijoux de Savoie

provenant de l’archiduchesse Marguerite et donnés à [Béatrice de | Portugal], duchesse de Savoie.

{Orig. Arch. Nord, B 2399, n° 84222).

Charles, par la divine clemence empereur des Romains..…., a nostre chier et feal

chevalier et gentilhome de nostre chambre le seigneur de La Chaulx, par nous commis sur le faict de noz finances ou lieu et en absence des conte de Nassau et

seigneur de Praet, grand et second chambellans et du s' de Noircarmes, premier sommelier de corps, salut et dilection. Sçavoir vous faisons comme nostre amé et feal conseillier et garde de noz joyaulx Pierre de Cortewille, escuier, ayt par nostre ordonnance et exprez commandement delivrer et distribuer les bagues d'or, pierreries et joyaulx telz et de la qualité que cy apres sont declairëéz et speciffiéz, venans de feue madame Marguerite, nostre bonne tante, dont Dieu ayt l’ame et selon l'inventaire qu’il en a de nous: Assavoir ung beaul et excellent carboucle dit le carboucle de Savoye, mis en une petite boitte d'or esmaillée avec une verge d’or agrapes servant a mectre ledict carboucle quant l’on veult.

Item, une seinture d'or faicte a charnieres, avec une petite gibessiere y servant, le tout esmaillé de blanc et rouge, en laquelle sont quinze trousses de perles rondes a trois, avec quatre petitz grains d’esmail noir a chascune trousse, dix huit diamans de diverses tailles et trois rubis cailloux dont l’un est au clouant de ladicte gibessiere appelé ladicte seinture de Savoye, et pese le tout ung marc cinq onces deux et demi esterlins, et ne pesoit que ung marc cinq onces en l'inventaire, mais ledict garde joyaulx y a adjouster par nostre commandement les deux et demy estrelins d'or pour y avoir fait a fere quelque charniere pour clorre.

Item, plus le monde d’or venant de Savoye ou sont quatre princes pourtans une civiere, assavoir l'empereur, le roy de France, le duc de Savoye et le duc de Cleves, sur quoy ledict monde est assis, avec ung crucifix dessus ; a l’entour de ladicte cyviere sont sept balaix avec dix perles enchassées a l'entour, et, au pommeau de l'espée de chascun prince, y a une perle; a l’entour du monde et de la croix sont unze ballaix et trente et une perles, pesant le tout neuf marcz quinze et demi esterlins, pesa, selon le contenu de l’inventoire, neuf marcz dix sept et demy esterlins, pesa moings de deux esterlins a cause qu’il y a tumbé quelque fleurettes et esmail, desquelz carboucle, seinture el monde comme dessus speciffié avons fait baïller et delivrer a nostre tres chiere et bien amée belle seur, la ducesse de Savoye. Donné en la cité d’Aste, le vingt et huitieme de juing mil cinq cens trente et six.

Nostre garde joyaulx nous a envoyé par nostre ordonnance, nous estant en Aste, dois Naples, ou il estoit avec noz joyaulx, le riche carboucle, le monde d’or garny de pierreries et de perles et la scinture d’or aussi garny de pierreries et de perles, le tout venant de Savoye... Donné en nostre ville de Vailladolyd, le deuxième jour de juing l'an de grace mil cinq cent trente et sept. Contresigné : BAVE.