PREUVE XXX

[1509], 22 mai, Brescia. — Lettre de Claude de Seyssel à Marguerite d'Autriche concernant les relations de l’archiduchesse avec le duc de Savoie.

{Original. Arch. Nord, B 19005, n° 39027].

Ma tres redoubtée dame.

Je me suis trouvé par le commandement du roy mon maistre avecques messecigneurs de Viry et le president de Bourgoigne (‘), ambassadeurs de l’empereur vostre pere devers monseigneur de Savoye, pour aucunes chouses dont mesdicts seigneurs les ambassadeurs avoient charge qui vous touchent, et m'y suis emploié en ensuivant la charge que j’avoie dudict seigneur roy le moings mal que j'ay peu telement que, par la bone conduite de mesdicts seigneurs les ambassadeurs et aussi pour le bon vouloir que mondict seigneur le duc a envers vous, les chouses ont esté acordées au plus pres de l'intention dudict seigneur empereur et de sorte que a mon advis vous en contenterés et cognoistrés le vouloir de mondict seigneur le duc estre bon et entier a vous complaire en toutes chouses ainsi que la raison le veult. Et si par le passé y a eu quelque petit different, l'attriburés au temps et a la joenesse et aurés tousjours, par la vertu et haultesse de vostre cueur, l'amour et l'affection que avés eu par le passé a la Maison et au païs ou vous avés esté tant aimée, honorée et estimée et serés tousjours tant que ceulx qui vous y ont cogneu seront en vie.

Madame, si j'estoie si homme de bien que vous sceusse faire quelque service, je me tiendroie bien heureux quant il vous plairoit le moy commander, tant pour le debvoir que je y ay que pour les sens et vertus qui sont en vous dont tout le monde a veu l'experience.

Madame, je prie Nostre Seigneur qu'il vous doint tres bone vie et longue.

Escript a Bresse le XXII° de may.

Vostre tres humble et tres obeissant serviteur Signé : CLAUDE de SEYSSEL.

{Au dos]: À ma tres redoubtée dame, madame Marguerite, douhaigere

de Savoye.