PREUVE XXXVII

(1510, juin], — Mandement de Marguerite d'Autriche concernant la mission de Jean Lemaire pour l’extraction de l’albâtre de Saint-Lothain, destiné à Brou.

[Minule. Arch. Nord, B 19182, n° 44515).

Marguerite, etc., a noz améz et feaulx conselliers Loys de Vauldrey, bailli d'Aval et a Symon de Chantran, gouverneur et capitaine de Mon[tmorot] et a chascun de vous ou de voz lieuxtenans, salut. Comme, apres le trespas de feu prince de bonne memoire nostre tres chier seigneur et espoux le duc Philibert de Savoie, cuy Dieu absoille, Nous, pour la singuliere amour et affection que lui portions en son vivant, ce que ne debvons oublier apres, ayons a l'honneur de Dieu premierement et consequemment pour le bien et remede des aimes dudict feu seigneur et de ses parens et aliéz, fait fonder et ediffier le couvent de Saint Nycolas de Tolentin lez Bourg en Bresse, ouquel lieu les corpz dudict feu seigneur et madame Marguerite de Bourbon, sa mere et nostre grand tante, reposent, et soit nostre intention augmenter ledict ediffice et fondation de tout nostre povoir et y faire eslever deux ou trois sepultures si riches et sumptueuses comme a telz prince et princesses appartient, affin que ceulx qui les verront cy apres ayent occasion de prier Dieu pour les ames, pour lesquelles sepultures dresser, en ensuivant l'exemple de noz feux predecesseurs ducz et contes de Bourgoigne, nous soit mestier avoir bonne quantité de marbre noir, lequel avons desja envoyé querir en Liege, et autre grand quantité de marbre blanc qu'on dit albastre, dont avons entendu qu'il se treuve une bonne carricre au lieu de Sainct Lotain lez Poligny en nostre conté de Bourgoigne au bailliage d'Aval, pour lequel faire extraire et conduyre en quantité convenable nous soit necessaire deputer et commectre ung personnaige a ce souffisant et ydoine et a nous feable, savoir faisons que nous, confians a plain des sens, loiaulté et bonne diligence de nostre chier et bien amé serviteur et indiciaire Jehan Lemaire, avons icelui commis et commectons nostre commissaire et serviteur especial en ceste partie pour fere fere, solliciter et pourchasser l'attrait et fourniture de la pierre d’albastre necessaire pour ladicte euvre, commettre les ouvriers sur ce propices, fere lever ledict albastre, icelluy tailler et traire de ladicte carriere de Saint Lotain par telz quartiers et quantitez que lui et le maïistre tailleur d’ymaiges en baïlleront les eschantillons et mesures, et d'illec les faire charrier jusques audict couvent de S. Nycolas de Tolentin lez Bourg en Bresse [pour] illec estre mises, en payant deuement et raisonnablement tout ce que en ce cas fera a payer et frayer, et de ce fere lui avons donné povoir, auctorité et mandement. Si vous mandons, et a chascun de vous en droit soy si comme a luy apartiendra, que nostredict indiciaire et commissaire en tout et partout ou il vous requerra a l’execution de sadicte charge vous assistez et faictes assister par noz subjects es mectes de vos offices, faisant par iceulx nosdicts Subjectz conduyre et charrier ladicte quantité de marbre meme jusques es frontieres de noz pays de Bresse a pris raisonable, cessants les contreditz et empeschemens a ce contraires et non obstant oppositions et appellations et sans prejudice d'icelles, car tel est nostre plaisir, et de ce vous donnons plain povoir, auctorité et mandement special par ces presentes, nonobstant oppositions ou appellations quelconques. Donné.….