PREUVE XXXVIII

[1510, vers le 14 juillet). — Lettre de Marguerite d'Autriche à Jean Lemaire au sujet des travaux de Brou et de la collaboration de Thibaut Landry et de Perréal.

{Minute non datée. Arch. Nord, B 18929, n° 36224].

De par l’archiducesse et contesse, etc.

Chier et bien amé, nous avons conclud et deliberé fere le sepulture a Brou de l'alebastre estant audict Brou par vous prins a Saint Louthain dont vous voulons bien averty afin que, suyvant vostre commission, vous poursuyviez ceste affere selon que vous en avons donné la charge par vostre dicte commission.

Nous escripvons a maistre Thiebault de Salins, auquel a csté marchandé de ladicte sepulture, se tirer audict Brou et besongnié a diligence sur icelle, et sur tout qu'il se furnisse des meilleurs euvriers qu'il pourra trouver, et a ce tiendrez main, aussi que le patron de Prospere /sic/ Coulombe doibt fere aux despens dudict maistre Jaques /sic/ soit fait. Nous escripvons de ceste matiere a maistre Jehan de Paris, auquel en communiquerez.

Aussi le solliciterez fere le pourtraict et patron de l’eg[lise] que entendons fere audict Brou, si fait n’estoit et, icelli fait avec son advis, nous ferez envoyer incontinent, car nous avons deliberé fere continuer a ladicte eglise ceste caresme, et ne cesserons qu'elle ne soit parfaicte au plaisir de Dieu.

Au surplus, desirons bien sçavoir de vostre besongnie, et si avez riens de nouveau, nous ferez plesir nous en escripre. A tant, chier et.

À nostre chier et bien amé secretaire et indiciaire maistre Jehan Le Maire.