PREUVE XLII

[1510], 14 novembre, Bourg. — Lettre de Laurent de Gattinara, procureur de Bresse, à Marguerite d'Autriche concernant le lieutenant de Bresse.

{Autographe. Archives Nord, B 18850, n° 299601].

Ma tres redoubtée dame,

Vous m'avés mandé que je m'avise en la justice de par deça de voz drois. De moy, je suis le plus ingnorant de tous et le moindre, mais pour m'acquitter de mon devoyr et vous obeyr, je suis marry que je suis contrain vous escripre de l'estat en quoy est vostre justice de present, et ce pour la faulte et indiscrection de vostre lieutenant messire Combet, lequel, comme :il est tout notoyre, est ung homme particulier et affectionné tousjours d'ung costel (lire costé) ou d’aultre, et combien que l’on luy aye deffenduz non faire ryens es cause fiscales sans moy appeller, tant par voz lectres, Madame, que aultrement, il n’en veult ryens faire, disant qu'il fera comme il a accoustumé, que ne sera pas vostre prouffit, Madame, ny aussi de voz pouvres subgectz si n’y remediés.

Madame, dernicrement quant monseigneur fust en ceste ville, il donna audience deux jours publicque pour ouyr les plaintes d’ung chescun, mais jamais n'y fust fait plainte sinon contre le dict lieutenant, et de gens de bien dont devant mondict seigneur ne sieust faire excuse quelconques, et de cas, Madame, si grandz et en tel nombre que en seryés hebaye et qui seroyent trop longs a raconter.

Madame, pour soy justiffier devant mondict seigneur, apres lesdictes accusacions faictes, il vint dyre a mondict seigneur publicquement, luy cuidant complaire et en ma presence, Madame, qu'il n’estoyt point Margaritain, dont mondit seigneur luy feist une honteuse responce et depuis ne le vouloist veoyr ne ouyr, et dit publicquement qu'il est lieutenant de mondict seigneur, comme j'ay escript bien au long a vostredit gouverneur.

Madame, de tout ce que je vous escriptz et de plus grandz choses je le maintiendray sur mon honneur, vouz assurant, Madame, que si n’y donnés ordre, n’est poussible qui n’en sortisse quelque inconveniant. Et ce que je vous en escript, Madame, c'est pour ma descharge et obeyr a voz commandemens. Escript a Bourg ce quatorziesme jour de novembre.

Vostre tres humble et tres obeissant serviteur, Signé: LAURENS GATTINAIRE, procureur en voz pays de Bresse.