PREUVE XLVII
1511, 2 mars, n.st. Malines. — Lettre de Raphaël Le Nadre à Jean de Marnix, sollicitant sa protection pour un office.
{Original. Arch. Nord, B 18834, n° 27065/.
Monseigneur le secretaire.
Je vous prie, en ensivant la requeste que vous feiz a vostre partement d'icÿ touchant l'estat et office de machier que j'ay possessé et desservi du vivant de feu le
roy de Castille etc, qui Dieu pardoinst, affin que par vostre moyen j'en puisse semblablement possesser devers monsecigneur le duc Charles aux gaiges telz que du vivant dudict feu roy y estoient ordonnéz.
Je vous prie d'autre part vous informer se l'on fera aucun estat a part aux dames, et se oudict estat s’y feroit maistre de la Chambre, contrerolleur et clercs des offices. S’ainsy estoit, fcriéz bien demander pour vous l’estat de maistre de la Chambre, et se ne le voulliéz demander pour vous, se par vostre poursuite et moyen y povoye parvenir, je vous prommets en donner tel pot de vin que par deux ou trois vos bons amys seroit dit que ainsi faire devroye, ou que vous et moy nous trouverions d’accordt sans en empeschier aultrui. La chose vault bien y vouloir entendre, et de ce qui vous en pourroit advenir, soit dudict estat ou d’aultre qui me pourroit estre duisable, vous prie de vostre grace en avoir l'offre et advancement de par vous avant tous autres, et quant aux deniers et payement ne trouveréz faulte. Je n’ay espoir avoir aucune provision se ce n'est par vostre moyen.
Mademoiselle vostre compaigne et vostre heritier sont en tres bon point.
Monstréz moy sy vous plait en quelque chose que vous voulez servir de moy. Mon entendement est petit mais la reste jusques a cent florins pres de tout ce que Dieu m'a presté est vostre. De ma part vous povéz tenir asscuré pour furnir a voz bons plaisirs tant par dela que par deça de mil florins d’or et avec ce de ma personne prest accomplir voz bons desirs. Ce scet le Saint Esperit qui, monsecigneur le secretaire, mon tres honnoré seigneur, vous ait en sa saincte garde.
À Malines le second jour de mars XV° et dix.
Vostre humble serviteur, Signé : Raphael LE NADRE.
{Sur le dos]: Mon tres honnoré seigneur, maistre Jehan Marnix, secretaire de l'Empereur, de Monseigneur et de Madame la douagiere de Savoye, a present embassadeur devers l'Empereur.
