PREUVE L

(1511, mars]. — Rapport de [Louis de Balliant] sur sa mission en Bresse et en Faucigny.

{Aulographe. Arch. Nord, B 18981, n° 37992).

Messeigneurs, si tres humblement que fere je puis plus me recomande a vostre bonne grace.

Messeigneurs, encontynant que fus de par decza, m'en allay fere la reverence a Monseigneur qu'estoit a Chambery, et d'aventure trovay ceulx de Gordam cryant apres Monseigneur et apres le Consseil, disant que les officiers de Madame les pillioient et que l'on avoit assencer ledict Gordan a ung que ce nomme La Montanyere de ceulx de Gramon, et ballioient XXX articles contre luy et contre son curial ; et entre ces articles disoient comme La Montanyere amenoit les prisoniers quan les vollours en n’avoient pris au chateulx et avoit efforcer fillies Jeans et avoit forragier ung curé a Lurtes et plussicurs aultres maulx, et disoient qu'il avoient esté a Bourg, mes que nulle justice n'y avoient trovéz, et soy querellent aussi fort de l’advocat de Borg qui est leur juge. Je fis tant que Monseigneur me balliat la suplicacion et les articles et le mandey a Borg a messeigneurs du Consseil pour y remedier, mes james n’en ont rien fet comme je cuyde, car l’on m'a dit que monscigneur de Messymieu en n'a eu VI escus au soulleil depuis, et surtout a esté une chose mal fete de assencer Gordam a tieul homme, car chascun scet bien que p'oseroit aller a Bourbonoys d'ou il est, et ou Conseil de Chambery, l’on apelle Gordam « Spelunca latronum », pour quoy vous y adviscrés.

Monseigneur avoit ballier une aultre commission aussy pour aller a Sallanche en Foucigny, don je le dis que Madame m'y envoit pour regarder se ces officiers pillioient les bonnes gens et se l’on y tenoit bonne justice, car Madame ne desire que

de fere fere tenir justice et bonne raison. Et encontynant, il fist rompre sa commission, don le gran escuyer fust bien mal contant, car il l'avoit donnéz la composicion. Et lendemain m'en allay en Foucigny et ne trovay pas le juge, car monseigneur le viconte l’avoit en Allemagne mander pour la marque qu’il a avec de Furno, et allay a Sallanche et la trovay le chatellein et Le Frasse tout en armes. Je le pris et le mys en prison, et james nulz ne moy reffusat de moy obeyr quan je le comandey de la part de Madame et tous les compagnons me suyvirent et obeyrent pour l'amour de Madame, et a la verité dire, La Frasse avoit tort et non pas le chatellein. Je les fis fiancer et respondre es mains du procureur fiscal et le fis aller a La Bonneville atondre que le juge fust venuz, mes avant, je le fis bons amys et soy sobmyrent a la dite du juge pour les interest de Madame, car james n’ay touché en poin des denyers ny composicion de Madame et tout est remys au juge et au procureur fiscal et au tresorier, et avant que je partisse, je apointay Monfort et La Frasse ou tant de gens de bien on fally et qui tenoient tout le païs en discorde grande. Je y fis trois ou quatre aultres apoinctemans ou il estoient viellies haynes et discencions et le fesoient vollantier pour l’onneur de Madame, car je leur fesoie encroere que madicte dame m'avoit envoiéz la expressement pour cella fere, car tous les jours ce entrebastoient comme diables, et tous estoient blessé et plusieurs tuês et mors sus la place, et pour brief, je ne lessay discorde ny haynne en tout ce quartyer, cenon de dux Monffors et le doy aller appointer a Geneve en ce moys de mars, et le fault fere car tous deux ont grande suyte en ce pays et seroient cause de gran mal.

J'ay esté a Flumet et la, eulx avoient retenu les ossieges de fromages deja dux ans et pleydoient a Madame a Chambery et nulz ne savoit rien, don jo les mys en prison et le fis menner devant le juge, don il ce sont obligé de non james le retenyr et de les sautisfere au tresorier de Madame. Ceulx de la ville ont copés ung gran boys qu'estoit a tout jour mais pour la reparacion du chateaulx, et Monseigneur en fesoit gran bruyt. Je les ay fet condampné a quadruple du bois et des interest de Madame devan le juge et le procureur et le tresorier et ancor d’aultres compocisions qui seroient trop longes a racompter. Je fus a Monjoie et y a une bonne composicion et bien maulvaise contre le chatellein La Frasse et tout ay lessé au juge et aux aultres dessus nommés. À Passie, je n'y ay rien trové contre le chatellein, cenon que Madame est trompée de L florins pour an, car le chatellein a les ossieges de Madame pour. florins et se l'on le cryoit, l'on en n'aroit LV ou LX florins par an, et ay demandé de qui le sist et le j'ay sceu que le chatellein de Flumet, le chatellein de Monjoie et celluy n’on james conter de baus des bestes de ceulx de Beauffort depuis Madame a eu Foucygny. Jay esté a Cluses, mes du bally n’ay james eu nulle querelle, mais il est nonchallant, car je y a trové de bonnes composicions que j'ay mys en avant, et, entre les aultres, il y a un gran terme de tamps que ung prestre ce pendit ot le sien valloit VIT florins et tant a esté extimé, et les parans allegoient qu'il estoit a l’evesque, et encontynent j'envoyay a Gencve vers monseigneur Milliet et vers monseigneur Gros, et me manderent, se il n’estoit curé, que monseigneur l'evesque n'y avoit rien et tous ces bien je les myse a le main de Madame, et est devan le juge et le procureur fiscal. Ledict prestre avoit la chapelle du chasteau de Cluses que ce nomme Chatillion. Je vous prie que Madame le moy donnet car Monseigneur l'a donnet à ung aultre, mes je l’arey bien et vous prie que cella l’on me donnet pour ma dangereuse paynne, car ce prestre doit manger careme prenant. Y ci, je suis a ung aultre mandement que ce nomme Samoyen, et pour quatre sindiques tout le mandement estoit en armes a poin de soy batre et le chatellein tenoit une partie. Je les fis venir a Cluses a mon logis et commis a dux de Cluses que il vissent leur compte et en XXIIII heures les apointay et furent bons amys; et la partie qui

avoit tort pour le mutynement et assemblé de gens qu'avoient fet et auxi le chatellein qui les suportoit, je les envoyay a monseigneur le juge qui les fist respondre et fiancer pour Jes interest de Madame. Le chatellein de la Bonneville est frere de monseigneur le tresorier Vionet et est asses aspre aux povres gens, mes il a monseigneur le juge qui l'en gardet. À Chatellet de Credot, n’ay rien trové que le chatellein, ny aussy a Foucigny et m'on dit les bourgeus que il n'eurent james si homme de bien pour chatellein…