PREUVE LII

[1511], 1 avril. — Lettre des habitants de Cluses, Sallanches et Bonneville et autres villes du Faucigny à Marguerite d'Autriche.

{Orig. Arch. Nord, B 19252, n° 46241).

Tres redoubtée dame, tres affectueusement vous remercions de la tres necessaire visitacion qu'a esté faicte par deça en voz scignoiries de Focigny par vostre maistre d'hostel le seigneur de Verboz, par lequel avons cogneuz le bon vouloir et amour qu'avéz a nous, dont sumes tres heureux. Et nous a ledit seigneur de Verboz tous enhortéz de par vous a vivre en paix et tenir bonne union ensemble, ce que ferons mieulx que jamais, considerant que sumes soubz vostre main, que nous est ung singulier bien et prouffit.

A semblablement ledit seigneur de Verboz de par vous visité toutes les places,

villes et seignoriez de vostre dit pays de Foucigny et a controuléz tous les officiers qui du passéz avoient mesuséz et abuséz de leurs officiers et commis pilleries et extorcions sur les povres gens du pays, tellement que les povres gens ont reuz le leur et iceulx officiers pugays par vostre juge de Foucigny. Et entre aultres, a ledit seigneur de Verboz de par vous appaisier plusieurs vielles querelles et haïinnes mortelles ce qu'avoient bien failliz plusieurs bons personnaiges, mais dez lors qu'ilz ont cogneuz que c’estoit de par vous, de bon cueur se sont bien tost rengéz.

Pour quoy, tres redoubtée dame, vous humblement supplions que puys qu'il vous a pleu encommencer faire telle visitacion, que vostre bon plesir soit y perseverer, et nous ferés ung tres grant bien, car cela donra craynte a voz officiers grans et petiz de non faire injustice ne travailler et extorquer voz pouvres subgectz, en quoy faisant, nous prierons Dieu pour l’entretencment de voz nobles estat et prosperitéz.….. À Sallanche, Cluse et Laz Bonnes Villes, ce premier jour d'avril.

Les vostres tres humbles, tres obeissans subgectz et serviteurs de voz pays de Foucigny.