PREUVE LXIII

(1512, début juin]. — Lettre de Marguerite d'Autriche à [Chivilliard] pour le concours d’'Henriet de Lyon aux travaux de Brou.

{Minute. Arch. Nord, B 19182, n° 44517),

Tres chier et bien amé, pour ce que nous desirons besongner a toute diligence a nostre eglise de Brouz, et mesmement que icelle eglise soit faicte el construicte selon et enssuivant le patron que vous avons envoyé, desirons bien que vous informiez a maistre Henryet de Lyon sy scet quelque bon maistre masson, soit audict Lyon, ou celx qui firent nagueres l'eglise de Villefranche et que, par son conseil et advis, vous fissiez marchiet avec ung bon maistre ou deulx se mestier estoit, ainsi que aviserez avec ledict maistre Henryet pour besongnié a ladicte eglise et conduyre l'ovraige d'icelle. Et si ledict maistre Henryet le vouloit entreprendre moyennant quelque gracieux pris que pouvez convenir avec lui, le vouldryons bien, ou du moings en lui donnant une pension qu’il y vint une foys le mois et qu'il regardast de choisir ouvriers tels qu'il les congneut pour besoigner en Jadicte eglise. Et sur ce que dessus vous informerez le plustost que pourrez, et de ce que en trouverez, nous avertissez a diligence par homme expres s’il est besoing, sans toutesfoys riens conclure que premier ayes entendu le tout, car selon que trouverons que aurez fait, ferons regarder de par deça si treuverions encores un melleur merchiet. Nous vouldryons bien que faictes tirer autre patron sur celluy que vous avons envoyé pour ladicte eglise et que vous envoyez cellui que aurez fait sur ledict patron pour le monstrer aux maistres de par deça, et n'y faictes faulte. À tant.