PREUVE LXIV

1512, 20 août, Bruxelles. — Lettre de Marguerite d'Autriche au duc de Savoie concernant Claude, bâtarde de Savoie.

{(Minute, corrigée par Marnix. Arch. Nord, B 18840, n° 29130/.

Monseigneur mon bon frere, je me recommande a vous de bien bon cueur.

J'ay par Savoye, vostre officier d'armes, entendu ce que luy avez chargé me dire quant au fait de mon cousin le conte de Nassou et ma seur la Bastarde. Et pour ce que mondict cousin de Nassou n'est icy, ue si est peu fere autre que ce que verrez par l’escript que ledict Savoye porte. Et quant a ladicte Bastarde, j'estoye en traicté de la marier bien et haultement comme je vous ay fait dire par maistre Anthoine de Salive et qu'ay dit audict Savoye moyennant vostre bonne ayde, touteffois s'il vous plaist l'envoyer querre, pourveu que ce soit dedens la Toussains prouchaine, la vous delivreray voulentier, esperant que en feréz vostre honneur et prouffit et que la pourréz plus haultement logier que moy, et aussi que par ce moien m'en tiendray deschargée et si ne l’envoyéz querir dedens ledict temps, considerée la grandeur de sa personne et sa curpulence, sera de besoing adviser d'en fere pour le mieulx

parmy vostre bonne assistence ; mais si l’'envoyés querre, n'est besoing que apres la me renvoyéz, car je ne luy seroye trouver tel party que feroye bien a present, veu que ea s’en allant, tous les partiz que ay en main seront delaissés, et pour la mal logier, l’ayme mieulx en voz mains que es myennes, car je y auroye trop de regret. Au demeurant, s'il y a service que vous puisse fere en me le faisant savoir, le feray de bon cueur. Ce scet Nostre Seigneur, monseigneur mon bon frere, auquel je prye vous donner voz desirs. Escript a Bruxelles, le XX° jour d’aoust X V°XII (*).