PREUVE LXIX

[1515], 12 juillet. — Lettre de Jacques Annocque, procureur de l’archiduc en cour de Rome, concernant la collation de l’abbaye de Saint-Claude en faveur de Pierre de La Baume.

fAulographe. Arch. Nord, B 18859, n° 30770).

Tres redoubté dame.

Ayant receu vous lettres le XXI° de julliet, ensamble une a nostre Saint Pere le pape et au cardinal d'Engleterre et a l'ambassadeur du Roy Catholique et au l'orateur du roy d’Engleterre en faveur de monseigneur l'abbé de Saint Glaude, me suys retiré vers eulx et, presentant lesdictes Jettres, et tant fait que lesdicts seigneurs cardinal d'Engleterre, ensamble le cardinal de Surrente, que ensamble sommes incontinent allé vers nostre seigneur le pape, luy remonstrant vostre bonne volonté, ensamble les outraiges que l'evesque de Vincence faisoit audict seigneur de Saint Glaude. Et viendrent vousdictes Jettres si bien appoinct que sans faulte ledict de Saint Glaude eult eu sentence contre luy, ensamble le sequestre, nonobstant que le seigneur de Carpy en avoit pryé nostredict seigneur par deux foys de consentir un delay aultrefoys obtenu par monseigneur le cardinal de (Gource en faveur dudict Sainct Glaude, lequel, incontinent apres le partement dudiet seigneur de Gource, le pape avoit revoqué et en a esté importuné tellement que jammes jour n’est que le seigneur Constantin, oncle dudict evesque de Vincence, en a eslé deux fois vers nostre scigneur, mes, apres que nestre Saint [Pere] avoit lise vostre lettre, disoit aux cardinalx d'Engleterre et de Surrente et a l'ambassateur d'Espaingnie qu'il entendoit bien que vous aviez ceste matere bien fort a ceur et me demandoit si je savoye bien que vous aviez escript toute la lettre, car il luy sambloyt bien que vostre nom estoit d'ung aultre main que ladicte lettre. Et je luys diz que je savoye bicn que avez escript toute la lettre et que a jourd’huy ne vous pouroit fairre plus grant plaisir que de imponer silence audict evesque de Vincence. Sur quoy promist ausdicts cardinalz

et ambassateur qu'il estoit content de faire tout son mieulx de contenter ledict de Vincence et croy que nostre Saint Pere advoquera ladicte cause et proces pour en appointer soit par pension ou aultrement. ù

Madamme, quant vousdictes lettres sont arrivé a Romme, le scigneur de Carpy estoit hors de Romme en une abbaye de Saint Poul, mes le dimance le XXII° de jullet, a ceste cause pour assister et obtenir delay duques (lire jusques) apres les vaucances, et envoya incontinent pour moy et luy compta comment le jour devant nous avesmes besongné avecque nostre Saint Pere don il estoit fort joyeulx. Et est bien marry que le tenez suspect en ceste matere, a cause que ceste foys ne luy avez point escript et l’aultre foys luy avez escript en aultre sorte que avez accostumé, non obstant qu'il en a toutjour fait son devoir, car ledict evesque de Vincence et son frere, avecque le seigneur Constantin, sont les plus grans inimis qu'il a en ceste court de Romme, et sans point de faulte il en a toutjour fait son miculx que luy este possible, et mesmes ledict dimance, en ma personne, il en a fait son devoir et promist nostre seigneur de recif qu'il en ferra ce que luy serra possible ; toutefoys en cas que monseigneur le cardinal de Luxenburch ne mande point telle certification et en la forme qu’on luy a envoyé, je me doubte que monseigneur le prothonotaire de La Baulme en sera contraint de donner queque recompense, pourquoy il est besoing de faire diligence vers ledict cardinal pour avoir ladicte certification devant que les vacances soyent finies. Et a cause que ledict evesque de Vincence se doubte qu’il pouroit avoir queque enpaissement, 1l a permué son dict evesché de Vincence afin qu'il n'aye riens subjet a l'Empereur, car Vincence estoit et est encore a l'obeissance de l'Empereur et de Roy Catholique, pour mieulx povoir proceder contre ledict prothonotaire. Toutefoys je croy qu'il en est bien long de faire ce que cuydoit faire. Nostre Saint Pere dist her ou cardinal Surrente que vouldroit bien complaire et servir aux princes qu'il ont escript en faveur de monseigneur le prothonotaire, moyennant qu'il veult donner queque grosse recompense, et demande ledict de Vincence son abbaye qu’il a en Peumont. J’ay respondu audict cardinal que vous n’y vouldriés jammes consentir car on m'a dist qu’elle vault pres autant que l’abbaye de Sainct Glaude. Madamme, il vous playra respondre a Nostre Sainct pere et audict cardinal vostre bonne volenté.

Monseigneur le cardinal d’Engleterre a esté maladde depuys le III° jour de ceste mois qu'il fust vers nostre seigneur en la matere de monseigneur l'abbé de Saint Glaude, et disoit on her au pallais qu'il estoit mort. Mes, grace a Dieu, il est ung peu emendé et donnent bon espoir les medecins qu'il ne morera point de ceste maladie, aydant Nostre Seigneur a qui je prye qu'il vous donnet, très redoubté damme, ce que vostre tres noble cuer desire. Escript a Romme ceste XII° de jullet.

Vostre tres humble et obeisant serviteur indigne, Signé : JACQUE ANNOCQUE.

(Au dos : a Madame). Avec un cachet écartelé aux 1 et 4 de trois rustes (losanges

percés d’un trou) et aux 2 et 3 de deux épées en sautoir, avec un écusson à la fasce brochant sur le tout.