PREUVE LXX
[1515], 21 octobre, Bourg. — Lettre du Conseil de Bresse à Marguerite d'Autriche sur l’entrée de Louis de Gorrevod en sa cité épiscopale de Bourg et sur les travaux de Brou.
{Original. Arch. Nord, B 19175, n° 44271 avec cachet rond sur papier de 25 mill. de diamètre aux armes de l'archiduchesse, parties de Savoie el d’Autriche- Bourgogne).
Nostre tres redoubtée dame, tousjours tres humblement nous recomandons a vostre bonne grace.
Madame, le penultime jour d’aoust passé, tres reverend pere en Dieu messire Loys de Gorrevod, evesque de Mourianne et de vostre cité, a faict en ycelle vostre cité de Bourg son entrée a grande consolacion de tout vostre peuple, en apres a celebrer le synode le dix neuviesme de ce moys, qu'a esté chose fort loyable ct pleine de toute devotion, et csperons vostredicte cité tousjours de plus en plus en emender. Et comme avons entendu, par la teneur des bulles appostoliques, le tout que soloit estre du diocese de Lyon, tant en Savoye, Bresse que Beauljoloys, entre la Sohone et le Rosne, maintenant et d’yci en avant sera du diocese de vostredicte cité de Bourg quant a la spiritualité, et quant vostre bon playsir sera y donner cella qu'est constitué devers vostre conté de Bourgoigne, que par cy-devant tenoit quant a la spiritualité l’archevesque de Lyon, entendons nostre Sainct Pere le passera, que sera ung aultre gros bien a vostredicte cité et fort convenant par les raisons don plus amplement monseigneur le prothonotaire de Cornon, present pourteur, par ces instructions vous informera. Sy nous a ressamblé vous en advertyr a long et supplier vostre bon playsir soit fere ce gros bien a vostredicte cité, oultre les aultres que par cy devant y avés faitz et journellement vous plait il fere.
Madame, nous avons escript a mons. de Losanne pour avoir du marbre noir, et avons de luy repceu bonne responce par laquelle il vous offre le tout, et mesmemant celluy qu'il avoyt faict tirer pour son ediffice.
Madame, maistre Loys [van Boghem] s'en va par devers vous, lequel vous informera plus a long touchant vostre ediffice de vostre eglise de Brouz, tant ya pour le passé jusque yci encour n’y avons trouvé sy gros apprest qu'il y est maintenant, vous asseurant que c'est tres belle chose a veoir et estre le tout bien compasser, nous trouvons la quarte partie de vostre eglise de ceste heure estre perfaicte. Voz maistres de present il font jours et nuyt grosse diligence et esperons il continueront, a quoy nous employerons et donrons bon ordre de nostre costé.
Madame, a la solicitation de mess. voz religieulx et par l’advis desdicts maistres, avons ordonné acheter une partie de mayson assise la pres avec ces appertenances pour l'accomplissement neccessaire a vostredict ediffice, comme desja cy devant vous avons adverty.
À Bourg, ce XXI d'octobre.
Vos tres humbles et tres obeissanz subgetz et serviteurs, Les gens de vostre Conseil en Bresse.
