PREUVE LXXV

[Vers 1516]. — Lettre d'Yves de La Howarderie, religieux au Reclus de Chambéry, à Marguerite d'Autriche.

{Autographe. Arch. Nord, B 1535, n° 16811.

Jhesus Maria.

Ma tres honnourée et tres redoubtée dame, tant et sy tres humblement et du melieur endroit de mon povre ceur qui m'est possible je supplie a Nostre Sauveur Jhesus qui vous doint le sallut qui donne a ses bons amis et amie, moy indienne (lire indigne) d'en priier et de vous saluer, mais la grant humilité et charité qui est en vous le me fait faire. Et pour tant que moy indienne (lire indigne) ay esté et suis encore l’ung des plus pety de vos povres serviteurs et a tous les vostres, premier je ay, moy indienne, servy feu mon tres redoubté seigneur monseigneur vostre gran pere Charle bien XIIII an, apres je ay servy nostre sire et tres redoubté seigneur l'Empereur vostre pere, et apres je fus mis en vostre serviche au Vergié en Angou et estoie encoire a vostre serviche au marchié de Miaux quant feu le roy Charle vous envoia la robe che (/1re chez) monseigneur des Melin pour ung jour de Noel, et quant vous fuste menée en Espaienne, je fus mis au serviche du feu roy vostre frere qui Dieu a l’ame (ms l'aile) et tous autres et apres tou ce, je me suis mis au serviche du Roy par desus les autres, portant l’abit de penitanche de la tierche ordre de monseigneur sain Fransois et povre reuclus en vostre ville de Chanbery, sans jamais sortir que deux fois en ung an, c’est a savoir le jour du Sain Suaire et le jour du Presieux Cor de Jhesus Crist, pour aler a la poursession avecque les autres. Et pour ce que suis mal prouveu de chappe honnourable pour sortir ce dict jour, je vous en demande unne pour l’ongneur de Nostre Seigneur qui soit armoiié de vos armes, el sy vous vint a plaisir de furnir la chasuble et les tornique, je serons /sic/ obligié au grant jamaies de prier pour feu mon tres redoubté seigneur et pour vous et les vostre, et sy donneres a connaitre comment la povre maison de La Hovardrie a servy vous et vos predisesseurs, lesques sont risu (lire issu) de vostre noble maison de Flandre et de Savoie et en portons les armes.

Ma tres redoubtée dame, sy vous savies les grans povreté que je porte depuis le trespas de feu Madame et depuis le partement de madame la duchesse de Nemours vostre seur, vous serics esbahie et ne ay que deux povre paien (/ire pain) de gros

monoie de Savoie par simainne pour toute aumonne. Et sy m'a mis avecque moy mon tres redoubté seigneur vostre frere le povre frere Benoit dit Seplage, recluz, lequel vous salue bien humblement, et morons de fain lung pour l’autre, pour quoy vous supplie de nous avoir pour recomandé en vos aumonnes et ausy vers nostredict tres redoubté seigneur et prinche monseigneur vostre frere et que luy rescripmes deux mos pour nous, et vous ferés une grant aumonne et charité, et a mon tres redoubté seigneur monseigneur le conte vostre frere, lequel nous aieme fort pour ce qu'il est averty de feu Madame que nous estiemme risu de noble sanc, comme ilse monstre en vostre esglise de Nostre-Dame de Lingselle en Flandre et a La Hovarderie et a Cavrienne (*) et tout en vostredict païs et ansy que je ne vous vodroie avertir que de veryté, comme celuy qui suy et demouray le plus pety et le plus humble de vos orateurs et serviteur de voz humbles serviteurs, et me faisant commander vostre bon plaisir et vollenté pour l'aconplir, comme set Nostre Seigneur auquel je supplie qui vous doint ce que vostre tres noble ceur desire et paradix en la fin, amen. Escrip en vostre povre renclusage de Nostre Dame de Grasse a Chambery par le plus que vostre indienne povre fis et reuclu, Frere Yve de La Hovardrie (?).