NÉGOCUTIONS AVEC MARIE STUART
Juin et juillet 1583.
Sommère du traicté entre la sérénissime royne d'Escosse et le comte de Sereusbury (Shrewsbury) et sieur Walter Mildmay, conseillers du conseil privé de la sérénissime royne d'Angleterre, et par elle députez avec l'assistance du sieur Bealle (Beal), secrétaire de son conseil*.
1. Ce sommaire des négociations relatives à Marie Stuart se trouve dans les archives de la (àmille d'Esneval.
Les dicts députez arrivèrent icy le premier de juing*, selon la vieille computation , présentèrent à Sa Majesté des offres fort favorables de la dicte royne d'Angleterre pour le dict traicté, et de donner toute satisfaction à Sa Majesté en toutes choses justes et raisonnables à leur commung honneur et seuretez.
Les affaires et conditions qu*ilz proposèrent furent telles que Sa Majesté, en accomplissant le traicté d'Édenbourg •, faict après le siège de Litz (Leith) du vivant du roy de France François second, recongnoistroict la dicte royne d'Angleterre et ses hoirs légitimes procréez de son corps pour légitimes successeurs de la royne d'Angleterre.
Que Sa Majesté ny son fils ny aultres, par leurs juremens, ne cherchent de molester, inquiéter ou offencer la personne de la dicte royne d'Angleterre, son gouvernement et Estât, mais au contraire le suporteroient et maintiendroient.
Pour le droict prétendu par sa Majesté en la succession de ceste couronne, la dicte royne d'Angleterre s'obligeroict que, de son vivant, rien ne seroict faict et ordonné au préjudice du dict droict.
Sa Majesté ne traicteroict avec le Pape, jhésuites, prestres ou seigneurs anglois en France ou aultres, tant au dedans qu'au dehors du royaulme, en chose quelconque tendant à l'altération de la religion establie en ce pais, mais en ce cas, leur résistera et les dénoncera aultant que viendra à sa cognoissance.
Sa Majesté et son filz se joindroient avec la dicte royne d'Angleterre en toutes guerres offensives et deffensives; spéciallement l'assisteroient-ils, aussy-tost que faire se pourroict, pour remettre l'Irlande en bon ordre et repos.
Ligue perpétuelle seroict faicte entre la dicte royne d'Angleterre et sa dicte Majesté et son filz et entre les deuxroyaulmes pour éviter, advenant la mort de la dicte royne d'Angleterre, toute invasion des étrangers.
