A la... » et de même à la phrase suivante

guieres qu'il ne vuidast hors de son pavillon, et portait, en lieu de cotte d'armes, une parure à manche d'ung drap damas, sur fleur de peschier, et estoit tout couvert et broudé de fusilz, de pierres et d'estincelles de feu, qui fut la devise du bon duc Philippe, son bon seigneur et maistre. 11 avoit le bassinet en la teste et estoit son visaige couvert d'une grosse visière trouée en grans trous en losange, et tenoit sa hache en ses mains, qui furent grosses haches pesantes, dont le mail estoit faict à manière de trois coings à fendre bois; etn'avoient point de pointe de dessous, pour ce que, par le contenu des chappitres, iiz debvoient combatre du maillet seulement. Fièrement marchoit le seigneur de Ternant ; et d'aultre part saillit Galiot, sa cotte d'armes au doz, bassinet en teste et la visière baissée et close, et, si tost qu'il fut saisi de son baston, il se sourdit tout en air moult vigoureusement. Et marchoit à rencontre de son homme de telle vertu et de telle puissance, que le rencontre de luy faisoit à redoubter autant que d'homme que j'ay veu devant ne deppuis. Et quant vint à l'aborder, le seigneur de Ternant qui vit la contenance, la chaleur et la fîere emprinse de son adversaire, qui venoit sur luy comme pour rencontrer des corps avec leurs bastons, luy, pourveu de son sens, tout asseurement desmarcha en costiere, tellement que Galiot ne trouva riens devant et passa tout oultre, comme celluy qui marchoit de toute sa force, et, au passer, le seigneur de Ternant haulsa la hache et atteindit Galiot entre col et teste, et luy donna si grand cop qu'il le fit tout chancelier, et se n'eust esté sa grant ligiereté et la très extresme force qui fut en luy, certes il fust cheu de celluy cop,

mais il print pied moult vigoureusement et courut sus au seigneur de Ternant par telle force et par telle aygreur, que force fut au seigneur de Ternant desmarcher trois ou quatre grans pas tous d'une tire, et se trouva tout entreprins de soubstenir le faiz de celle grande puissance. Toutefois il se remit au marcher et se maintint si chevaleureusement qu'ilz y achevèrent les quinze coups; et gecta le duc le baston, et furent prins par les gardes et escoustes et admenez devant le duc, les visières levées, chascun la hache au poing, et certes c'estoient deux moult beaux et moult fiers personnaiges à veoir. Chascun s'offrit de son costé de parachever ses armes, se faute y avoit, et le duc leur fit response que bien et duement avoient leurs armes accomplies, et alors prindrent congié du duc. Mais ilz ne touchèrent point ensemble, pour ce qu'ils avoient encoires à faire leurs armes de cheval, et se tira chascun en son entrée de la lice ; mais ilz s'arrestarent l'ung devant l'aultre, pour ce que nul des deux ne vouloit yssir le premier de la lice, et fut ordonné par le duc que tous deux sauldroient à une fois.

Par la manière dessus escripte furent achevées les armes de pied du seigneur de Ternant et Galiot de Baltasin, au grant honneur et louange de chascun party, et fut par ung jeudy vingt septiesme d'avril1 l'an quarante six, et le lundy suyvant, qui fut le second jour de may, leur fut baillé jour pour faire et accomplir leurs armes à cheval ; vint le duc et sa seignorie sur la lice environ deux heures après midy, et tantost î/près arrivaient les huict gardes moult bien armez et