CHAPITRE XXI

Comment le bon duc Philippe fit délivrer un riche Anglois que le seigneur de Ternant avoit fait prisonnier ; et comment le seigneur de Lalain teint le pas de la fontaine de Plours à Chalon sur Sosne.

En celle saison1, messire Philippe, seigneur de Ternant, fut conseillé de prendre ung Angloix que l'ondisoit moult riche et puissant d'avoir et de deniers; et estoit assez coustumier icelluy Angloix d'aller de Bruges à Calais, et passoit par Gravelines ; et, pour ce que ledit seigneur de Ternant sçavoit que la duchesse de Bourgoingne pourtoit et soubstenoit le cas et la querelle des Angloix, il s'appensa de conduire son cas et sa prinse par subtilité, et tint manière de donner congié à plusieurs ses serviteurs, qui tous se rassemblèrent à l'entour de Gravelines ; et les conduisoit un souldoyer du chastel de l'Escluse dont ledit seigneur de Ternant estoit cappitaine, nommé Georget des Vignes. Finablement prindrent ledit Angloix, et l'emmenèrent contre France, comme leur prisonnier. Le duc de Bourgoingne fut adverty de ceste prise, faicte en ses pays ou es limites ; et, en estant aussi la duchesse advertie, fut faicte une merveilleuse poursuyte pour ceste matière ; et finablement furent envoyez après, à toute diligence, les archers du duc et aultres, qui firent