J'eclaircisse

pourrait estre demandée sur ceste matière, qui est telle1 : pourquoy ledit messire Jaques tint pas en Bourgoingne, terre subgecte de son souverain seigneur et prince, et n'avoit2 excepté les subjectz de son prince ; et aussi pourquoy il entreprenoit son pas en temps de jubilée, et durant icelle saison. Ad ce je respondz par la propre response à moy faicte par ledit messire Jaques, car j'avoye privaulté et habitude à luy, pour sçavoir de ses secretz, aultant qu'aultre de mon eage de la maison de Bourgoingne, et disoit que la cause de sa venue en Bourgoingne tendoit à deux fins. La première, pour ce qu'il y avoit au pays grant noblesse et gens qui désiraient d'eulx monstrer nobles et couraigeux , la seconde, pour ce que le pays estoit situé au passaige de France, d'Angleterre, d'Espaigne et d'Escosse, pour aller à Romme dont les sainctz pardons et la jubilée de l'an cinquante approuchoient 3 ; et sembloit que , par ces deux raisons , plus de nobles hommes seraient advertiz de son emprise, et pourraient plus de nobles hommes venir à son pas, et toucher à sa noble emprise ; parquoy plus ligierement luy estoit facile de parvenir au second poinct, qui estoit qu'il désirait, soubz le plaisir de Dieu, d'avoir présenté sa cotte d'armes ou sa personne en lices closes, et avoir combattu trante hommes avant qu'il eust trante ans d'eage. Car, à la vérité, il avoit, à l'heure qu'il vint en Bourgoingne tenir son pas, plus de vingt neuf ans, d'ung mois, ou de sept sepmaines ; et pour ces deux raisons, dont l'une tenoit de l'aultre,