Pommeaux

« Ladicte litière estoit portée par deux chevaulx noirs moult beaulx et moult fiers, lesquelx chevaulx estoient enharnachez de velours bien, à gros cloux d'argent, richement, et sur iceulx chevaulx avoit deux petitz1 paiges vestuz de robes de velours bleu, chargées d'orfavrerie, ayans barrettes de mesmes; et estoient houssez de petitz broudequins jaulnes et sans espérons, et avoient chascun ung fouet en la main.

« Dedans ladicte littiere estoit ledit chevalier, à demy assis sur grans coussins de riche velours cramoisy, et le fons de sadicte littiere estoit d'ung tappis de Turquie. Le chevalier estoit vestu d'une longue robe de velours tanné, fourrée d'ermines, à ung grant collet renversé, et la robe fendue de costé, et les manches fendues par telle façon, que, quant il se dressa en sa littiere, l'on veoit partie de son harnois. Il avoit une barrette de velours noir en sa teste et tenoit toute manière de chevallier ancien, foulé et débilité des armes porter. Ladicte littiere estoit adestrée de quatre chevalliers qui marchoient à pied, grans et beaulx hommes, qui furent habillez de palletotz de velours bleu, et avoient chascun ung gros baston en la main.

« Après ladicte littiere venoit ung varlet de pied, vestu de la livrée de monseigneur de Ravestain, qui menoit en sa main ung destrier en selle, couvert d'ung riche drap d'or bleu chargé de grosses campanes d'argent et bordé de grandes lettres d'or de brodure à la devise du chevallier; et après icelluy destrier venoit ung sommier portant deux grans panniers, où povoit estre le surplus de son harnois. Les deux