Jusques

grans lettres de brodure de fil d'or, et une grant bordure de mesmes, chargée de campaniles d'argent. Son escu estoit couvert de mesmes ; et après luy venoit le destrier, que on avoit mené en main, après sadicte littiere, couvert comme il est dit dessus ; et n'y avoit autre chose à dire, sinon que dessus ledit destrier estoit monté ung paige habillé d'orfavrerie, en manière de ceulx qui menoient ladicte littiere ; et après revenoit son sommier, et puis sa littiere, telle que dessus est escript. Et après que ledit seigneur de Ravestain eust fait le tour parmy la lice, en attendant la venue du chevallier à l'Arbre d'or, prestement sonnèrent les trompettes qui estoient dessus la porte ; et fut ladicte porte ouverte par plusieurs archiers de corps de mondit seigneur le bastard, qui la gardoient; et prestement se apparut ung grant pavillon jaulne tout semé d'arbres d'or de brodure; et au dessus avoit une pomme d'or, où estoit plantée une bannière des armes de mondit seigneur le bastard ; et fut conduict ledit pavillon jusques au bout de la lice; et ne veoit l'on riens de la conduicte dudit pavillon, excepté six petitz paiges à pied, vestuz d'orfavrerie, qui tenoient la main audit pavillon.

« Après le pavillon venoient sept chevalliers ou nobles hommes vestuz de palletotz de drap damas blanc, montez sur bons chevaulx, aians harnois de jambes. Lesdits chevaulx estoient couvertz de courtes couvertes de velours violet, semées de gros boutons dorez, auxquelx pendoient grosses campaniles d'argent; et incontinent que le pavillon fut au bout de la lice, les lances furent choisies d'une part et d'aultre devant les juges, et fut apporté à chascun une lance ; et

lors fut ouvert le pavillon où estoit le chevallier à l'Arbre d'or, monté et armé comme il appertenoit. Ledit chevallier portoit ung escu vert, et lequel escu vert fut porté par le chevallier à l'Arbre d'or tout au long de l'emprinse. Son cheval estoit couvert de velours violet. Et si tost qu'ilz eurent d'ung costé et d'aultre les lances sur la cuisse, le nain, qui estoit sur le perron, dressa son orloge, qui estoit de voirre plain de sablon, portant le cours d'une grant demye heure, et puis sonna sa trompe tellement que les deux chevalliers le peurent ouyr. Si mirent les lances en arrest, et commencèrent leur jouste, laquelle fut bien courue et joustée ; et eust encores myeulx esté, se ne feust le cheval de mondit seigneur de Ravestain, qui sur la fin ne voulut si bien aller comme il avoit commencé ; et, durant celle demye heure, rompit le chevallier à l'Arbre d'or plus de lances que le chevallier venant de dehors, parquoy il gaigna la verge d'or, comme il est1 contenu es articles du pas.

« Ainsy se passa la demie heure que tout le sablon fut coulé ; et, ce fait, incontinent le nain sonna son cor, et furent toutes les lances ostées d'une part et d'aultre ; et lors Arbre d'or le poursuyvant chargea sur son col deux gros planchois 2 blancs et semez d'arbres d'or ; et les apporta au chevallier venant de dehors, pour choisir lequel qu'il luy plairoit; et porta l'aultre à celluy qui gardoit le pas , et de ces deux planchois, à son de trompes et de clairons, firent une course sans attainte; puis se vindrent entre rencontrer les deux