Madame la nouvelle duchesse
« moult joyeulx de vostre venue; et en souvenance « des nobles bargieres qui par cy devant ont esté pas- « toures et gardes des brebis de pardeçà, et qui si « vertueusement s'y sont conduictes que lesdits pays « ne s'en sçavent assez louer, à ce que soyez mieulx « instruicte de leurs nobles meurs et condictions, ilz « vous font présent de ceste belle bergiere, habillée et « embastonnée de vertueulx habillemens et bastons ad « ce servans et propices, vous suppliant que les ayez « en souvenance et pour recommandez. » Et en ce disant lesdits deux chevalliers prindrent ladicte bergère, et la présentèrent sur la table, et madicte dame la receut très humainnement, et n'est pas à oblier que la houlette et pannetiere servans à la bergiere estoient tous paintz et nommez de vertuz. Et ainsi le lyon recommença sa chanson, et retourna par où il estoit venu.
« Le tiers et derrenier entremectz pour celluy jour fut ung grant dromadaire qui entra parmy la salle, faict auprès le vif par tel artifice, qu'il sembloit mieulx vif que aultrement ; et estoit harnaché en la manière sarrasinoise , à grandes campannes dorées, moult riches, et sur son doz avoit deux grans paniers, et entre iceulx paniers assis ung homme, habillé d'estrange façon ; et quant il entra en la salle , ledit dromadaire remua la teste, et tenoit une contenance saulvaige; et celluy qui estoit dessus ouvrit les paniers, et en tiroit oiseaulx estrangement paintz, comme s'ilz veinssent d' Ynde , et les gectoit parmy la salle et par dessus les tables; et en tenant ceste contenance, à sons de tromppettes et de clairons fist le dromadaire son tour par devant les tables, et retourna par où il
estoit venu ; et plus n'en fut faict pour celluy jour, et ne firent pas après soupper longues danses ; car avant que les tables fussent ostées, il sonna trois heures après mynuyt. Si fust tantostl'espousée menée coucher; et du surplus du secret de la nuyt, je laisse à l'entendement des nobles parties; et reviens au deviser de l'adventure du lendemain, qui fut le lundy1, second jour de la feste.
« Ce lundy disna monseigneur le duc en la grant salle ; et avoit assis au dessus de luy madame la duchesse de Nolfolck, et de l'aultre costé madame d'Arguel2. Aux autres deux tables furent en l'une toutes les dames, et en l'aultre tous les chevaliers et seigneurs angloix ; et fut on grandement servy ; et au regard de madame de Bourgoingne, la mère, et la nouvelle duchesse, elles disnerent en chambre ; et tantost que le disner fut passé, on se tira sur les rens pour veoir la jouste.
« Gomme dit est dessus, les dames et la seignorie allèrent sur les rens pour la jouste veoir, excepté les deux dictes duchesses, qui pour icelluy jour n'y allèrent point ; et sitost que mondit seigneur le duc fut sur les rens, fut apporté le blason de monseigneur de Chasteau Guyon, frère de monseigneur le prince d'Orange et nepveur de monseigneur le conte d'Armignac ; et après fut allé querre par le géant et par le nain, et se présenta en la manière qui s'ensuyt.
« Monseigneur de Chasteau Guyon estoit monté et armé, le heaulme en la teste et l'escu au col, comme il appertenoit. Son cheval estoit couvert de drap d'or
