Mot omis dans les éditions précédentes
cramoisy; et après luy avoit deux aultres chevaulx, dont le premier estoit couvert de drap d'or bleu, et le second de drap d'or violet ; et sur lesdits chevaulx estoient montez deux paiges vestuz de mantelines de satin vert, et devant luy avoit sept nobles hommes, pareillement vestuz de mantelines de satin vert. Les chevaulx estoient enharnachez de drap , tous d'une façon ; et ainsi fut par le géant présenté aux dames, et fit son tour comme le premier, par devant l'Arbre d'or et par devant les juges ; et puis print son renc pour son emprinse fournir.
« Tantost après fut la porte ouverte par où debvoit venir le chevallier à l'Arbre d'or ; et prestement saillit dehors ledit chevallier, à tout son escu vert, son cheval couvert d'ung riche drap d'or ; et avoit devant luy quatre gentilzhommes, leurs chevaulx houssez de drap damas blanc, et par dessus semés d'arbres d'or de brodure, et les gentilzhommes vestuz de mantelines de satin tanné. Le chevallier venu, leur furent leurs lances présentées, et le nain mist son orloge et sonna sa trompe ; et ainsi commença la jouste.
« Durant celle demye heure coururent lesditz chevalliers dix huict courses, et rompit le chevallier à l'Arbre d'or dix lances, et ledit seigneur de Chasteau Guyon neuf; et fut la première fois que ledit seigneur de Chasteau Guyon avoit jamais jousté. Mais il se porta si bien et si vivement en icelle jouste, qu'il en fut moult prisé de tous; et, après la demye heure achevée, coururent des planchons une course, sans attaincte; et paya ledit monseigneur de Chasteau Guyon une verge d'or, pour ce qu'il avoit moings rompu de lances que le chevallier à l'Arbre d'or.
« Après icelluy fut présenté le blason de Charles de Visan, ung escuyer, varlet.de chambre de monseigneur de Bourgoingne, lequel Charles se fît accompaigner par douze archiers du corps de mondit seigneur, qui le suyvoientà pied, etavoit seulement ung gentilhomme à cheval pour le servir ; lequel gentilhomme avoit ung palletot d'orfavrerie, et son cheval enharnaché d'orfavrerie, à la devise dudit Charles de Visan. Et le cheval dudit Charles de Visan estoit couvert d'une couverture d'orfavrerie, assise sur ung drap violet. Ladicte houssure estoit très riche, faicte à la devise dudit Charles ; et, son tour faict comme les autres, print le bout de son renc.
« A sons de trompettes et de clairons, partit le chevalier de l'Arbre d'or, à tout son escu vert, comme il avoit de coustume. Son cheval estoit enharnaché d'un harnois bleu, chargé d'orfavrerie et de grosses campanes d'argent; et coururent l'ung contre l'aultre, en celle demye heure, vingt et une courses; et rompit le chevalier gardant le pas neuf lances, et ledit Charles huict; et certes il y eust à celle jouste très dures attaintes d'ung costé et d'aultre ; car ilz estoient tous deux bons jousteurs, et rompirent plusieurs bois, dont on ne faict point cy de mention, et pareillement en ce pas1, car nulles lances ne furent tenues pour rompues, s'il n'y avoit quatre doigts de frans au dessoubs le rochet ou devant la grappe. Et ainsi fut celle jouste très bien joustée; et, le cor sonné par le nain, coururent une course de planchons qui ne fut point attainte ; et paya ledit Charles une verge d'or pour ce qu'il avoit le moins rompu.
