Tenuil

retirée; et fut actaiché, par dehors la courtine, certain escript de certainnes lignes, dont la teneur s'ensuyt :

Hercules en son bers, soubs povoir de norrice, Tua deux grans serpens de force, sans malice. Bon josne1 se monstra sa fortune propice, Dont son frère mourut, innocent et sans vice. Puisque sur deux bessons 2 portez d'une ventrée, Fortune se despart par diverse livrée, Dont l'ung laisse périr ainsi qu'une fumée, L'aultre porte en ses bras croissant en renommée, Bien devons Dieu doubter de cueur et de pensée ; Car c'est cil qui deppart où il veut sa souldée.

« Pour la seconde fois fut la courtine retirée, après le son des trompettes. Et pour le second travail de Hercules, furent veuz en ung bateau Hercules et Theseus, richement armez; et vindrent iceulx, boutans leurs navieres à leurs lances, jusques auprès d'une grant montaigne où il y avoit des moutons qui pasturoient. Hercules convoicta iceulx moutons, pour ce que au pays de Grèce n'y en avoit nulz. Si descendit jus de son navire, et fît reculer ledit naviere par Theseus; et vint au pied de ladicte montaigne, et sonna une grant trompe qu'il trouva là, et fîst semblant de prendre lesdits moutons. Et tantost saillit avant ung géant merveilleusement grant, tenant une hache en sa main. Hercules courut sus audit géant, et le géant à luy ; mais en peu d'heure le desconfit ledit Hercules, et le mist mort à la terre. Et tantost saillit de la montaigne le Roy Philotès, la couronne en la teste, et armé moult richement, qui courut sus moult vigoureusement