IG4 MÉMOIRES D'OLIVIER DE LA MARCHE

avoit trois chevaulx harnarchez de velours, semé de campannes d'argent. Son cheval estoit couvert de velours bleu, et sur sa teste avoit une grande bannerolle verde, frangée de blanc. Il y avoit trois paiges après luy, habillez de journades, comme ses serviteurs; dont le premier cheval sur quoy estoit le premier paige estoit couvert de velours bleu, à grandes lettres d'or de brodure de sa devise; le second, de drap d'or cramoisy, à une bordure de velours noir; et le troisiesme estoit de velours violet, semé de campannes d'argent.

« A l'encontre de luy se présenta monseigneur le bastard de Bourgoingne, gardant l'Arbre d'or. Son cheval estoit enharnaché d'ung harnois brodé d'orfavrerie blanche, et par dessus avoit grosses campannes dorées. En celle demye heure gaigna mondit seigneur le bastard la verge d'or sur son frère, pour ce qu'il rompit huict lances, et ledit messire Baudouyn n'en rompit pas tant.

« Le dernier qui se présenta pour celluy jour fut monseigneur de Renty, filz aisné du seigneur de Gry, conte de Portien. Il avoit devant luy cinq chevaliers de grant maison, ses alliez, comme monseigneur Jaques de SainctPol, monseigneur de Roussy, monseigneur de Fiennes et messire Jehan de Lucembourg, et son frère messire Jehan de Gry 4 ; lesquelx avoient tous journades de satin blanc, et, au remanant, furent richement montez et enharnachez, chascun à sa devise. Son cheval estoit couvert d'une double housseure ; c'est assavoir le fond de satin blanc, et par dessus de velours