MÉMOIRES D'OLIVIER DE LA MARCHE. \ G
noir tout decouppé et destrenché à grans lettres de Y Y grégeois, par où on veoit le fond parmy. Son escu estoit de mesmes, et avoit sur son heaulme un moult beau plumas. Il avoit deux chevaulx couvers après luy sur quoy seoient les paiges, vestuz de drap d'or cramoisy en mantelines. Le premier cheval estoit couvert de velours bleu, broudé de Y Y grégeois à grans lettres d'or, à une grande bordure de drap d'or vert ; et le second estoitcouvert de moultriche drap d'orcramoisy .
« Le chevallier gardant le pas se présenta à l'encontre de luy, sur ung cheval couvert de drap de damas jaulne. La couverte estoit semée de testes de leoparts d'argent eslevez, ayans en la bouche une boucle de mesmes ; et à la course de celle demye heure rompirent chascun cinq lances, parquoy ne gaignerent point de prix l'ung sur l'aultre ; et, après le sablon couru et la demye heure passée, leur furent les planchons apportés, comme il est de coustume, et d'icelle course atteindirent l'ung l'aultre très durement, et rompit ledit seigneur de Renty son planchon en plusieurs pièces ; et ainsi se passa celle jouste , et faut revenir au bancquet, qui fut tel que vous orrez cy après.
« Premièrement furent les platz et les suytes plus grans et plus somptueux qu'ilz n'avoient estez à nulz des aultres banquectz ; et sur la table avoit quinze paons revestuz de col et de teste et de quehue, et les corps tous dorez de fin or; et parmy iceulx paons estoient entremeslez seize signes, tous d'argent, lesquelz paons et signes avoient chascun ung collier de la Thoison, et à leurs piedz ung petit blason des armes de chascun des chevalliers vivans de l'ordre ; et sur* leurs dos petites mantelines de soye, armoyées pareil-
Iement; et par cest entremeetz furent monstrez les tranteet ung chevalliers delà Thoison, à ce jour vivans ; et furent assis les paons et signes sur les tables, chascun en tel degré comme ilz vont à l'église en l'ordre, le jour de la solempnité de leur feste.
« Item, et par dessus lesdictes tables avoit plusieurs bestes portans sommaiges, comme grans elephans, à tout chasteaulx ; dromadaires, à tout grans panniers ; licornes, cerfz et bisches, chascun portans divers sommaiges. Et lesdictes bestes furent toutes estoffées d'or, d'argent et d'azur, et les harnachemens de fil d'or et de soye très richement, et estoient leurs sommaiges plains et garniz1 de diverses espiceries ; et oultre plus portoient chascun les armes d'ung seigneur subgect de mondit seigneur de Bourgoingne, et le nom de la ville ou seigneurie ; comment l'ung portoit Gondé en Haynnault, au nom de Nemours ; Avennes en Haynnault, au seigneur de Pointievre ; Sainct Pol [et] Enguyen la Bassée, au conte de Sainct Pol, connestable de France ; Dunkerke et Bourbourg, au conte de Marie ; et pareillement de tous aultres grans seigneurs, subgectz de mondit seigneur de Bourgoingne, en ses divers pays. Le bancquet fut bel et riche et fort regardé ; et se seirent tous les seigneurs, dames et damoiselles à table ; et aprez qu'ilz eurent commencé à manger, sur le hourt où paravant on avoit monstre quatre des travaulx d'Hercules, sonnèrent les trompettes, et là fut veu le cinquiesme travail d'Hercules, qui tel fut qu'il s'ensuyt.
« Premièrement furent veuz Theseus et Protheus2
