MÉMOIRES D'OLIVIER DE LA MARCHE. I

« Et tantost après se comparurent { Hercules et Theseus, montez et armez moult richement, et après eulx varletz de pied, armez et embastonnez comme il appertient ; et si tost que les damoiselles amasonnes apperceurent lesditz chevalliers, elles prindrent leurs heaulmes, leurs escuz et leurs glaives, et les deux chevaliers pareillement se préparèrent pour la jouste ; et incontinent se coururent sus les ungs aux aultres, et s'entre rencontrèrent très rudement ; et puis mirent les mains aux espées, et commença la bataille entre les quatre de cheval et les gens de pied, qui fut merveilleusement bien combatue et vivement faicte ; et dura la bataille très longuement ; et, fin de compte, fut la courtine retirée, sans monstrer qui l'eust meilleur d'icelle bataille ; et fut le billet mis dehors, tel qu'il s'ensuyt :

Hercules le vaillant, et le preux Theseus, En deux femmes armées trouvèrent telz vertuz, Que pour tous les perilz où se sont embatuz, Hz ne furent si près d'estre mors ou vaincuz. Puisque deux amasonnes et deux féminins corps Contre deux si puissans soubstindrent telz efforts, Exemple est qu'on doit craindre et bataille et discors, Son ennemy doubter, foible, menchot ou tors ; Car on a veu souvent, qui bien en est recors, Que les victoires sont où Dieu donne les sors.

« Après le siziesme travail d'Hercules passé, assez tost après fut la courtine retirée au son des trompettes, et là fut veu le septiesme travail, tel qu'il s'ensuyt.

« Premièrement fut veu Hercules armé de toutes armes, soy promenant seul ; et luy vint au devant ung