S'apparurent
monstre demy homme et demy serpent. Gelluy monstre avoit la teste armée, et en la main dextre ung gantellet et ung glaive, et en l'aultre main ung grant targon ; et quant Hercules approucha, le monstre fit semblant de parlementer à luy. Hercules luy respondoit par semblant ; mais Hercules prestement luy courut sus, et le monstre à luy moult fièrement. Mais la bataille n'eust guieres duré, qu'Hercules le joindit de son espée et le print à une main, et de l'aultre luy couppa la teste ; mais non pourtant le monstre ne cheut à terre , dont Hercules desmarcha , tout esbahy ; et ne se donnoit garde Hercules qu'il veit que le monstre luy couroit sus, et avoit sept testes. Hercules gecta la teste qu'il tenoit et courut sus au monstre moult vigoureusement, et fut la bataille assez longue ; mais en fin le occist Hercules, et tint manière de brusler le corps ; et à tant fut la courtine retirée, et le rollet mis dehors, qui disoit ainsy :
Hercules es paluz trouva le fier serpent,
La teste lui trancha -, mais tout incontinent
Sept aultres luy saillirent merveillablement ;
Mais toutes les trancha Hercules le vaillant.
Qui ung vice rencontre d'aguet ou d'aventure,
Sept aultres en viendra par estrange figure,
Et sera fort constant qui n'en aura morsure.
Faisons comme Hercules à l'ennemy injure ;
Tranchons luy les sept testes, qui sont plaines d'ordure,
Et nous gardons de faire à vice norriture.
« Après le serpent des paluz occis, pour monstrer le huictiesme travail d'Hercules, fut la courtine retirée au son des trompettes, comme devant, et là fut veu Hercules armé et embastonné de son escu et de sa massue; et se promenoit devant une cité, remirant la
beaulté des maisons et des murailles ; et tantost saillirent dehors plusieurs geans grans, fiers et hideulx, et estrangement embastonnez. Hercules leur courut sus moult vigoureusement, et fit tant en peu d'heure qu'il habatit quatre d'iceulx geans, et les aultres se mirent à genoulx devant luy ; et leur vouloit les testes copper, quant deux citoyens yssirent de la cité, qui se mirent à genoulx ; et luy présenta l'ung les clefz, et l'aultre luy mist une couronne d'or sur la teste ; et ainsi fut Hercules Roy de Gramonne ; et à tant fut la courtine retirée, et mis ung rollet hors, tel qu'il s'ensuyt :
Hercules, remirant les haullz murs de Gramonne,
Unze geans trouva, par manière félonne ;
Mais à leur grant-pouvoir n'acompta une pronne.
Tous les deffit, et print cité, et la couronne.
Hercules cy nous monstre vertueux exemplaire
Que, pour tourbe de gens, pour menacer, pour braire ',
L'homme chevaleureux ne se doibt point deffaire ;
Mais est digne d'avoir de couronne salaire,
Qui contre grant povoir ose frontière faire ;
Car on voyt peu souvent bon deffendeur deffaire.
« Sur ce point furent les tables levées, et commencèrent les danses ; et plus ne fut faict pour celluy jour.
« Le vendredi suyvant fut faict le disné assez lard, es chambres et es salles très richement servy2, pour ce que plusieurs jeusnoient pour le vendredi ; et mesmement les Angloix qui en ont fort la coustume, et vindrent sur les rens pour la jouste veoir ; et pour ce
