Jean de Rochefay, dit Rosquin

Visan, garde du pas. Son cheval estoit couvert d'armines, à une grande bordure de martres. Et coururent leur demye heure très bien et roidement, l'ung contre l'aultre ; mais ledit Roskin gaigna la verge d'or, car il rompit unze lances, et ledit Charles n'en rompit que dix ; et à la course des planchons firent une très dure attainte, et rompit ledit Roskin le sien.

« Ainsy se partit la jouste pour icelluy jour, sans autre feste ne assemblée, pour ce que la pluspart des gens jeusnoient, et estoit jour de poisson, qui ne sont point jours propres pour bancquetz ne festiemens.

« Le samedi septiesme jour d'icelle feste, se fit le disner, comme celluy de devant ; et vindrent les dames sur les rangs pour voir la jouste, et là furent plantez deux blasons à une fois, c'est à sçavoir celluy de messire Jehan de Ligne et celuy de messire Jaques de Harchies, deux chevalliers de Haynnault, tous deux chambellans de monseigneur le duc.

« Les deux chevalliers entrèrent en la lice à une fois, par le congié des juges. Leurs chevaulx estoient couverts tous pareilz, car, fust à la guerre ou à la paix, ilz ont tousjours esté compaignons; et estoit leur parure de velours violet aune bordure de velours noir, chargée de campannes d'argent très richement, et de lettres de brodure d'or à leurs devises. Et courut ledit messire Jehan de Ligne le premier.

« A l'encontre de luy se présenta messire Philippe de Poictiers, qui garda le pas pour celluy jour. Son cheval estoit enharnaché d'ung harnois d'orfavrerie blanche. Et gaigna ledit messire Philippe la verge d'or, pour ce qu'il rompit neuf lances, et ledit messire1