Deux mots omis par les précédents éditeurs

Jehan de Ligne n'en rompit pas tant; et prestement retourna ledit messire Philippe, garde du pas, dedans la porte dont il estoit yssu, pour changer la parure de son cheval, comme il estoit accoustumé ; et tantost revint après, dehors, sur ung cheval couvert de satin, à couleur de fleur de peschier, brodé à grans arbres d'or. Et ledit messire Jaques de Harchies, qui avoit attandu son compaignon, se présenta d'aultre costé, pour son emprinse fournir ; et coururent moult bien et deuement d'ung costé et d'aultre. Si y eust plusieurs grans attaintes, et rompirent plusieurs lances non comptées ; et n'y eust hommes qui se près marchandast le prix sur monseigneur d'Arguel, que fit ledit messire Jaques de Harchies, car il rompit douze lances ; mais toutesvoyes perdit il la verge d'or, pour ce que ledit de Poictiers en rompit treze ; et à la course des planchons rompit ledit de Poictiers le sien ; et ainsi firent les deux chevalliers une belle jouste.

« Après entra messire Philippe de Grevecueur, seigneur des Cordes. Il avoit devant luy deux1 chevalliers de la Thoison, et deux aultres escuyers vestuz de palletotz de drap d'or cramoisy. Le cheval de luy estoit couvert d'ung drap d'or cramoisy, et son escu de mesmes ; et après luy avoit trois chevaulx de parure, dont le premier estoit couvert de drap d'or cramoisy comme le sien ; le second, de drap d'or vert, et le tiers, de drap d'or bleu. Ainsi fut sa parure de quatre chevaulx, de drap d'or ; et dessus les trois chevaulx qui le suyvoient avoit trois petitz paiges vestuz de satin cramoisy, et par dessus de mantelines blanches et verdes, semées de larmes d'or en brodure ; et estoient