Hors le rollet

N'en voz subgetz régir, chascun se monstre saige De les bien tost destruyre, pour eschever dommaige. Car certes le sanglier, merveilleux et sauvaige, Ne fait pas tant à craindre que le mauvais usaige.

« Le dixiesme travail de Hercules monstre, jouèrent les trompettes pour la tierce fois d'icelluy jour ; et là fut veu Hercules, soy promenant par ung désert, atout son escu et sa grosse massue ; et des deux costez luy coururent sus plusieurs sagittaires, qui lui tiraient fleiches de tous coustez, tellement que Hercules fut long espace qu'il ne faisoit aultre chose que soy couvrir de son escu, à l'encontre du traict ; mais en fin de compte, Hercules print sa massue à deux mains, et ferit à dextre et à senextre sur les sagittaires, tellement qu'en peu d'heure les desconfit et mist en fuyte ; et les ratteindoit à force de courir, et les occioit ; et, la desconfiture faicte, fut la courtine retirée, et mis le rollet dont la teneur s'ensuyt :

Hercules es desers trouva les sagittaires, Qui de leurs fortes sayettes 1 luy furent mains contraires ; Mais tous les desconfit, par monceaux et par paires, Et ceux qui eschapperent priva de leurs repaires. Les grans fleiches aguës, qui Hercules battirent, Furent les faulses langues qui contre luy mesdirent. Les grans valeurs de luy les bourdes contredirent, Et fit tant par vertu qu'en le blasmant mantirent ; Et n'eust pas tant à faire à tous ceux qui nasquirent, Qu'à combatre parolles ; mais d'elles se veinquirent.

« Or fut passé le unziesme travail de Hercules ; et tantost après résonnèrent les trompettes, et furent les courtines retirées ; et là fut veu ung naviere ouquel