Son cheval fut couvert de

estre ; mais, pour les lances deuement et franchement rompues, monseigneur de Bourgoingne rompit huit lances, et monseigneur de Ravestain en rompit unze ; parquoy il gaigna la verge d'or. Les courses faictes, ilz touchèrent ensemble ; et en ce point fut le pas pour la jouste achevé, et à tant se fit monseigneur de Bourgoingne deshaulmer.

« Monseigneur de Bourgoingne, sa jouste achevée, se deshaulma ; tandis les roys d'armes et heraulx se tirèrent devers les juges pour sçavoir à qui le pris devoit estre donné ; lesquelz juges les renvoyèrent aux dames, pour en ordonner à leur bon plaisir ; mais les dames les renvoyèrent aux juges, et s'en rapportèrent à l'ordonnance des chappitres. Si fut regardé, par les livres et escriptures des roys d'armes et heraulx, qui plus avoit rompu de lances en la demye heure ; et fut trouvé que ce avoit esté monseigneur d'Arguel, lequel avoit rompu treze lances. Si fut par Arbre d'or, accompaigné d'aultres officiers d'armes, à grant bruit et à grans sons de trompettes et de clairons, ammené le pris sur les rens pour le délivrer. Lequel pris estoit ung destrier couvert d'une couverture de satin noir figuré ; et par les figures estoit broudée d'orfavrerie blanche, houssée et branlant. Et dessus le destrier avoit deux panniers, esquelx estoit le harnois de jouste, tout complet, de mondit seigneur le bastard. Et, à la vérité, ledit harnois estoit ung des beaulx harnois de jouste que on peust veoir. Et ainsi fit ledit Arbre d'or1 ; mena son pris autour de la lice, et puis vint trouver mondit seigneur d'Arguel, et luy présenta le pris,