Sorte de petites corbeilles

dont sur chascun avoit ung chappeau de vigne plain de fuilles et de grappes blanches et vermeilles, si bien faictes que ce sembloit proprement raisin.

« Item, et au plus beau de ladicte table, et à l'endroit de monseigneur, avoit ung riche ediffice, faict des mains de maistre Stalkin, chanoine de Sainct Pierre de l'Isle. Cestuy ediffice estoit hault et somptueulx, et moult soubtivement faict, car il y avoit ung palais, et ung hault mirouer où se veoit personnaiges incongneuz. Il y avoit personnaiges et morisques mouvans, moult bien et soubtivement faictz, roches, arbres, fuilles et fleurs ; et devant icelluy palais avoit une petite * fontaine qui sourdoit du doit d'un petit sainct Jehan. Celle fontaine rendoit eaue rose moult soubtivement contremont, et sembloit que celle fontaine arrosast les arbres et jardins d'icelluy bancquet ; et certes la fontaine fut moult bien et soubtivement faicte. Et après que la seignorie eut regardé les tables et ordonnances bien au long, chascun se alla seoir qui mieulx mieulx.

« Assez tost après entra parmy la salle deux geans de merveilleuse grandeur, richement et estrangement habillez en armes, et estoient embastonnez de merveilleux bastons; et après eux venoit, en leur conduicte, une balaine, la plus grande et la plus grosse qui fut jamais veue par nulz entremectz et presens en ung personnaige. Geste balaine avoit bien soixante piedz de long, et de haulteur si grande que deux hommes à cheval ne se fussent point veuz l'ung contre l'aultre aux costez d'elle ; ses deux yeulx estoient des deux plus grans mirouers que l'on avoit sceu trouver. Elle mou-