Aldermans

demoura pour veoir faire les armes, et tousjours l'espée devant luy ; et ne demoura guyeres que les gardes de la lice, à sçavoir huict hommes d'armes bien montez et bien armez, firent leur entrée en ladicte lice par le congié du connestable, qui leur ordonna ce qu'ilz dévoient faire. Tantost après monseigneur d'Escalles vint à l'entrée de la lice, et le connestable alla au devant de luy et luy demanda qu'il queroit; il respondit qu'il se venoit présenter devant le Roy d'Angleterre, son souverain seigneur, pour faire et accomplir les armes qu'il avoit emprinses à l'encontre du bastard de Bourgoingne, et sur ce luy fut fait ouverture ; et certes il estoit monté et armé richement, et avoit dix ou douze chevaulx de parure bien richement couvers ; et, après sa presentacion faicte devant le Roy, il se tira de sa personne en une petite tente qui luy estoit ordonnée ; et tantost après vint le bastard de Bourgoingne, qui pareillement demanda entrée, ce que l'admirai luy accorda. Et se présenta ledit bastard devant le Roy pour fournir ses armes ; et devez sçavoir qu'il estoit moult pompeusement accoustré, et avoit douze chevaulx couvers, les ungs de drap d'or, les aultres d'orfavrerye, les aultres de velours chargez de campannes, et les aultres couvers de martres, que l'on dit saibles1, si belles et si noyres qu'il estoit possible de trouver. Les aultres estoient couvers de brodures faictes moult richement. Les paiges estoient vestuz de mesmes, comme il appertenoit ; et certes ce fut une riche suyte, et que le Roy veit voulentiers. Sa presentacion faicte, il se retira en une petite tente faicte pour