Martes zibelines

luy, et prestement se firent les crys et les deffences accoustumées ; et furent portez au Roy, par deux contes, deux lances et deux espées d'une façon et d'une grandeur, car le seigneur d'Escalles, par les chappitres, debvoit livrer les bastons au choix de sa partie adverse; et envoya lesdits bastons le Roy au bastard de Bourgoingne pour choisir ce qui luy seroit pour le meilleur. Le bastard de Bourgoingne choisist assez ligierement, et furent mis les deux bastons qu'il retint es mains de deux officiers d'armes, qui les tindrent dehors le pavillon jusques il fust prest pour saillir; et, après crys et serimonies faictes, les champions furent saisis des lances et espées pour eux ordonnées. Si mirent les lances aux arresls et coururent celle course sans attaindre ou consuyr l'img l'aultre; mais au retour qu'ilz firent, et qu'ilz eurent mis les espées en leurs mains, le cheval de monseigneur le bastard donna de la teste contre la hâve de la selle du seigneur d'Escalles, et de ce cop ledit cheval se tua tout roide, et tomba mondit seigneur le bastard soubz son cheval, l'espée au point ; et tantost le fict le Roy d'Angleterre relever, et se monstra moult couroucé à l'encontre de monseigneur d'Escalles pour ce qu'il cuydoit qu'il eust fausseté en la parure de son cheval ; mais non avoit, ains advint ce cop et ce chocq par mesadventure , comme je l'ay devisé. Et le Roy leur donna congié pour celle fois, et s'en retourna mondit seigneur le bastard en son logis, et me dit, en rentrant en sa chambre : « Ne vous « souciez. Il a aujourd'huy combatu une beste, et « demain il combatra ung homme. » Et à celle heure vint le connestable, de par le Roy, pour sçavoir s'il

estoit aucunement blessié ; mais monseigneur le bastard respondit qu'il marcioit le Roy, et que nulle blessure n'avoit, mais qu'il estoit prest landemain de faire ses armes de pied, priant que ainsi le voulsit le Roy accorder. Et le landemain, à heure ordonnée, comparurent au camp monseigneur le bastard et monseigneur d'Escalles, et fut tousjours accompaigné mondit seigneur le bastard du duc de Suffort1, qui moult cordialement l'accompaigna. Et, après crys et serimonies faictes, monseigneur d'Escalles envoya trois mannieres de bastons présenter au Roy pour icelles armes de pied fournir et achever, et d'iceulx bastons devoit avoir le bastard de Rourgoingne le choix. Les deux premiers bastons estoyent deux lances à gecter et les portoient deux chevaliers. Les secondz bastons estoient deux haches et les portoient deux barons. Et les troiziesmes bastons estoient deux dagues et les portoient deux contes ; et quant iceulx bastons furent présentez au Roy, le Roy retint en ses mains les deux lances à gecter, et les autres quatre bastons envoya à monseigneur le bastard pour en prandre le choix selon le contenu des chappitres. Monseigneur le bastard retint une hache et une dague, et le surplus fut apporté par le connestable à monseigneur d'Escalles, et vindrent les escouttes de pied, à sçavoir six hommes d'armes de pied, bien en point, chascun ung baston de bois en la main.

Le bastard de Rourgoingne estoit paré de sa cotte d'armes de Rourgoingne, à une barre de travers, pour monstrer qu'il estoit bastard; et le seigneur d'Escalles