Auprès

place de madame la duchesse de Nolfolch et de madamoiselle d' Arguel ; mais pour ce que ladicte duchesse estoit travaillée, elle disna ce jour en sa chambre ; et n'eust d'icelluy costé que madamoiselle d' Arguel.

« Derrière l'espousée furent ordonnées madame la contesse d'Escalles et madame la contesse de Charny, pour aider et suppourter l'espousée, comme il est de coustume de faire en tel cas ; les aultres tables furent plaines de dames et damoiselles moult richement parées et vestues.

« Au regard du service, madame la nouvelle duchesse fut servie d'eschançon et d'escuyer tranchant et de pannetier, tous Angloix, tous chevaliers et gentilzhommes de grant maison i ; et l'uissier de salle cria : « Chevaliers, à la viande ! » Et ainsi alla on au buffet la viande quérir ; et autour du buffet marchoient tous les parens de monseigneur, tous les chevaliers tant de l'ordre que de grant maison, tous deux à deux, après les trompettes, devant la viande ; et puis grant nombre d'officiers d'armes, leurs costes d'armes vestues; et puis venoient tous les maistres d'hostel, tant de monseigneur que de madame , dont le dernier estoit messire Guillaume Bisse 2, premier maistre d'hostel, lequel a voit levé la viande au buffet ; et après venoit le pannetier, et le suyvoient dix ou douze chevaliers et gens de grant maison, qui portoient la viande. Et ne voulut point madame la duchesse, la mère, pour celluy jour, estre servie à couvert ; mais laissa l'honneur à sa belle fille, comme estoit raison.